O‘zbek san’ati rivojiga hissa qo‘shgan 11 nafar madaniyat xodimiga yangi uylar berildi

TOShKENT, 2 apr — Sputnik. O‘zbekiston Respublikasi Madaniyat vazirligining tizim tashkilotlaridagi bir guruh xodimlari oilalariga mo‘ljallangan 11 xonadonning kalitlari o‘z egalariga topshirildi, deb xabar qildi O‘zbekiston Respublikasi Madaniyat vazirligi matbuot-xizmati.

Yangi uylarga ega bo‘lganlar: Madaniyat vazirligi tasarrufidagi Alisher Navoiy nomidagi O‘zbekiston davlat akademik katta teatridan – dirijor Bobomurod Xudoyqulov, balet artistlari Ulug‘bek Olimov, Zamir Fazlutov, Nodira Hamroyeva, direktor o‘rinbosari Oybek Bahodirov, opera solistlari Rustam Alimardonov, Nosir Yusupov, Ma’suma Boltaboyeva, Shirin Mamatova, "Tumor" raqs ansambli bosh baletmeysteri Charos Jo‘raboyeva, O‘zbekiston Badiiy jamoalari ijodiy birlashmasidan esa "Navro‘z” ashula va raqs ansambli badiiy rahbari Zarina Ahmedova.

Aytilishicha, xizmat uylari taqdim etilishida xodimlarning mehnat jamoalaridagi faoliyati, yashash sharoitlari, fuqarolar yig‘ini, ish joylaridan taqdim etilgan tavsiyanomalar hamda boshqa barcha holatlar inobatga olingan.

"Misol uchun, B.Xudoyqulov yuqori malakali dirijor, xorijiy davlatlarda o‘z malakasini oshirgan, garchi katta maosh evaziga chet elda ishlash imkoni bo‘lsada, o‘z yurti san’ati rivoji yo‘lida mehnat qilayotganligi, qolaversa, oilasi to‘rt nafar ekanligi e’tiborga olingan", — deyiladi xabarda.