04:47 24 Sentyabr 2017
Efir
Kontsert-otkrыtiye dney uzbekskoy kulturы v Rossii v Gosudarstvennom Kremlevskom Dvortse

Kreml saroyidagi koʻzyoshlar, barchani oʻynatgan Gulsanam va "Lazgi" hamda oʻzbek quyoshi

Alina Xusainova
Madaniyat
Havola olish
187490

Kecha Moskvadagi Kreml davlat saroyida Oʻzbekiston madaniyati kunlari boshlanishiga bagʻishlangan tantanali kontsert boʻlib oʻtdi

TOSHKENT, 13 sen — Sputnik. Dilshodbek Asqarov. Kecha Moskvadagi Kreml davlat saroyida Oʻzbekiston madaniyati kunlari ochilishiga bagʻishlangan kontsert dasturi barcha kutganidan aʼlo oʻtdi desam adashmagan boʻlaman. Kontsert boshlanishidan bir soatcha ilgari saroy oldidagi maydonga kelganimda oʻzimni goʻyoki toʻyga kelgandek his qildim. Barcha bayramona libosda, qulogʻingizga tez-tez oʻzbekona salom-aliklar chalinadi.

Taklifnomani qoʻlda tutgancha kirish eshigi tomon yuramiz. Turniket, metallodetektordan oʻtgach, saroy tomon yuz metrcha yoʻl bosamiz.

Mana, oʻsha muhtasham Kreml davlat saroyi. Ichkariga kiramiz. Keng zal gavjum. Jurnalistlar, operatorlar xizmat vazifalarini bajarishmoqda.

Kontsert boshlanishiga ozgina qolganida zalga kirdik. Zalning deyarli yarmi ham toʻlmagan edi. Nahotki bugungi kontsertga qiziqish shunchalik past deya oʻyladim. Yoʻq, adashgan ekanman. Bir necha daqiqa ichida olti ming kishini sigʻdiradigan zal toʻldi. Chiroqlar oʻchirilib, sahna yoritildi.

Oʻzbekistonda xizmat koʻrsatgan artist, aktyor Fathulla Maʼsudovning shirali ovozi meni xayolan Oʻzbekistonga olib ketdi. Oʻzimni goʻyoki Oʻzbekistonda kontsert tomosha qilib oʻtirganday his qildim.

Sahnaga Oʻzbekiston xalq artistlari Muyassar Razzoqova, Ramiz Usmonov, Oʻzbekistonda xizmat koʻrsatgan artist Jenisbek Piyazov, Zulfiya nomidagi davlat mukofoti sovrindori Shirin Mamatovalar chiqib kelishdi. Ular ijrosidagi qoʻshiq va raqqosalar raqsi bilan badiiy dastur boshlanib ketdi.

Soʻngra sahnaga Oʻzbekiston xalq artisti Munojot Yoʻlchiyeva taklif etildi. Oʻsha ovoz, oʻsha chehra, oʻsha oʻzbek doʻppisi, oʻsha oʻrilgan sochlar, oʻsha milliy oʻzbek libosi. Bundan oʻttiz yil ilgari men koʻrgan Munojot Yoʻlchiyeva bugun ham xuddi oʻshanday. Uning ovozi butun zalni sehrladi.

"Oʻzbekiston" va "Navbahor" raqs ansambllari ijrosidagi raqslar oʻzbek milliy raqsining haqiqiy jozibasini namoyish etdi.

Ikkinchi jahon urushi yillarida besh million nafar qochoqni qabul qilgan oʻzbek elining matonati, jasorati va buyuk mehribonligi aslo unutilmasligiga kontsert davomida ishonch hosil qildim.

Oʻzbekiston xalq artisti, kinorejissyor Shuhrat Abbosovning "Sen yetim emassan" filmidan parcha koʻrsatilganida beixtiyor boʻgʻzimga nimadir tiqildi, koʻzimga yosh keldi. Rossiya xalq artisti Yuriy Stoyanovning oʻzbek xalqi haqidagi fikrlari, rossiyalik siyosatchi Aleksey Novotochinovning oʻzbek xalqi Oʻzbekistonga urush yillarida keltirilgan 650 ming nafar bolaning birortasini ham bolalar uylariga topshirmasdan oʻz oilalariga, oʻz bagʻirlariga qabul qilganliklari, bunday saxovatga faqat buyuk xalqgina qodir ekanligi haqidagi soʻzlaridan soʻng zalda gulduros qarsaklar yangradi.

Abduhoshim Ismoilov boshchiligidagi sozandalarning ijrolari ham olqishlar bilan qarshi olindi. Mashhur gʻijjakchimiz sozni shunday sayratdiki, agar Vanessa Mey zalda boʻlganida Abduhoshim akaga shogird tushgan boʻlardi, deb oʻyladim.

Sevara Nazarxon oʻz ovozi bilan Rossiyada koʻpchilikning mehr va hurmatini qozongani uning sahnaga chiqib kelishida gulduros qarsak va olqishlar bilan kutib olinganidan ayon boʻldi.

Kontsert-otkrыtiye dney uzbekskoy kulturы v Rossii v Gosudarstvennom Kremlevskom Dvortse
Alina Xusainova
Rossiyada Oʻzbekiston madaniyati kunlari boshlandi

Gulsanam Mamazoitovaning shoʻx qoʻshigʻi boshlangach, men oʻylagan va kutgan holat sodir boʻldi. Zalning u yer-bu yeridan tomoshabinlar oʻrinlaridan turib, raqsga tushishni boshlab yuborishdi.

Toʻlqin Jabborov ijrosidagi "Lazgi" esa deyarli barchani oʻrnidan turib raqsga tushishga chorladi.

Oʻzbekiston xalq artisti Farrux Zokirov boshchiligidagi "Yalla" guruhining "Choyxona" va "Uchquduq" qoʻshiqlariga butun zaldagi tomoshabinlar joʻr boʻlishdi.

Umuman olganda, kechagi kontsert oʻzbek madaniyati va sanʼatining qadim tarixga ega ekanligini, oʻzbek zamini isteʼdodlarga toʻla ekanligini, oʻzbek sanʼatkorlari dunyoning istalgan mamlakatidagi sahnalarda muxlislar qalbini zabt eta olishlarini namoyish etdi.

Kontsert-otkrыtiye Dney uzbekskoy kulturы v Rossii v Gosudarstvennom Kremlevskom dvortse
Alina Xusainova
Rossiyada Oʻzbekiston madaniyati kunlari boshlandi

Yuqorida nomlari tilga olingan sanʼatkorlardan tashqari, Oʻzbekiston xalq artisti Mansur Toshmatov, Oʻzbekistonda xizmat koʻrsatgan artistlar Kamoliddin Oʻrinboyev, Yulduz Turdiyeva, Oygul Nodirova, yoshlar simfonik orkestrining chiqishlari ham barchaning olqishiga sazovor boʻldi.

Mazkur kontsertni tashkillashtirgan tashkilotchilar, rejissyorlar ishi ham alohida tahsinga loyiq. Sanʼatkorlarning liboslaridan tortib tanlangan qoʻshiqlargacha, sahna ortidagi ulkan ekranda har bir qoʻshiq uchun tanlangan lavhalardan tortib sahna bezagigacha — barcha-barchasi ajoyib.

Kontsert dasturi ochilishida soʻzga chiqqan Oʻzbekiston madaniyat vaziri Baxtiyor Sayfullayev ajoyib bir lutf qildi.

"Biz Rossiyaga nafaqat oʻzbek sanʼati, madaniyatini, balki Oʻzbekiston haroratini ham olib keldik", dedi u.

Darhaqiqat, ora kunda qovogʻini solib oladigan, sharros yomgʻir quyib yuboradigan Moskva osmoni kecha oqshomda ham quyoshli edi. Mehr nuriga toʻla oʻzbek quyoshi Moskvada nur sochib, barchaga iliqlik baxsh etayotgandek edi goʻyo.

Ishonchim komilki, kechagi kontsert davomida tarovat baxsh etgan oʻzbek sanʼati va madaniyati tafti barchaning qalbida abadiy saqlanib qoladi.

Asosiy mavzular