TOShKENT, 20 fev — Sputnik. "O‘zbekko‘mir" OAJ yangi "Angren" shaxtasi qurilishiga 165 million dollardan ortiq mablag‘ sarflashga qaror qilgan, deb xabar qildi "O‘zbekko‘mir" vakili Sputnik muxbiriga.
Uning so‘zlariga qaraganda, bugungi kunda kompaniya yangi loyihaning texnik-iqtisodiy asosini ishlab chiqmoqda.
"Angren" shaxtasi har yili 4 million tonnagacha ko‘mir qazib olish imkonini beradi. Biz ushbu yilning III-IV kvartalida loyihaning bosh pudratchisini tanlaymiz. Yil oxirida esa loyihani amalga oshirish boshlanadi", — dedi kompaniya vakili.
Geologlar o‘tkazgan izlanishlarga ko‘ra, O‘zbekiston 5,7 milliard tonna ko‘mir zahirasiga ega. Ulardan faqat 1,9 milliard tonnasi o‘rganib chiqilgan xolos. Har yili O‘zbekistonda 4 million tonna ko‘mir qazib olinadi. Undan 85 % energetika sohasida ishlovchi korxonalarga yetkizib beriladi.
