TOShKENT, 16 avg — Sputnik. Raqobatni rivojlantirish davlat qo‘mitasining Toshkent shahar hududiy boshqarmasi bir necha davlat ko‘chmas mulk aktivlarini sotuvga chiqardi, deb xabar qilmoqda Toshkent shahar hokimiyati.
Savdoga qo‘yilgan ko‘chmas mulk obyektlari orasida bir necha binolar, binolar qismi, qurilishi yakunlanmagan obyektlar, "Istirohat" fabrikasi va "Sayohat" mehmonxonasi bor.
Obyektlarning eng qimmati "Sayohat" mehmonxonasi bo‘lib uning qiymati 28,6 mlrd. so‘m, ikkinchi o‘rinda "Istirohat" fabrikasi bo‘lib, u 20,6 mlrd. so‘mga sotuvga chiqarilgan.
Barcha ko‘chmas mulk obyektlari qisqa muddat ichida investitsiya kiritish, yangi ishchi o‘rinlari tashkil qilish majburiyati bilan sotiladi.
Savdoda ishtirok etish uchun sotuvchining hisob raqamiga sotiladigan obyekt qiymatining 15%dan kam bo‘lmagan miqdorida zakalat summasi kiritish va biznes-rejalarini taqdim etish kerak.
