TOShKENT, 5 sen — Sputnik. GM Uzbekistan kompaniyasi so‘m devalvatsiyasidan so‘ng o‘z avtomobillarini narxini oshirmasligini ma’lum qildi, deb xabar berdi Sputnik muxbiri avtoishlabchiaaruvchi matbuot-xizmatiga tayangan holda.
Shu bilan birga avtomobillar chakana narxi yuridik va jismoniy shaxslar uchun mamlakatda erkin konvertatsiya chora-tadbirlari joriy qilingan kungacha qanday bo‘lgan bo‘lsa o‘sha darajada saqlab qolinadi.
Shuningdek, 2017-yil 5-sentabrdan boshlab GM Uzbekistan mahsulotlari faqatgina milliy valyuta — so‘mda baholanadi.
Eslatib o‘tamiz, O‘zbekiston prezidenti Shavkat Mirziyoyevning o‘tgan dam olish kunlarida valyuta siyosatini liberallashtirish bo‘yicha dastlabki chora-tadbirlar to‘g‘risidagi Farmonni imzolagan edi. Hujjatga muvofiq endilikda jismoniy shaxslarga chet el valyutasini olish va sotish tartiblari soddalashtirilishi nazarda tutilgandi.
Kuni kecha O‘zbekiston Markaziy banki bir dollar qiymatini 8100 so‘m etib belgiladi. O‘tgan haftada MB ma’lumtlari bo‘yicha bir dollar bahosi 4210 so‘m 35 tiyinni tashkil qilgan edi.
