TOShKENT, 6 noya – Sputnik. O‘zbekiston korxonalari 1-dekabrdan boshlab tashqi bozorlarga o‘z mahsulotlarini eksport shartnomalari tuzmasdan yuborish imkoniga ega bo‘ldi.
Turli muassasalar nazorati talab qilinadigan shartnoma o‘rniga tadbirkorlar invoys (schet-faktura) taqdim etadigan bo‘lishdi. Bu haqida mahalliy OAVlarda e’lon qilingan prezident qarorida habar qilingan.
“2017 yil 1-dekabrdan boshlab tadbirkorlik subyektlariga tovarlarni, ishlar va xizmatlarni eksport kontrakti tuzmasdan, invoyslar asosida, eksport qiluvchilarning O‘zbekiston Respublikasi banklaridagi hisobraqamlariga oldindan to‘lov 100 foiz tushgandan so‘ng va TSOYaEA* tizimiga ma’lumotlarni kiritish sharti bilan eksport qilish huquqi berilsin”, — deyilgan prezident qarorida.
TSOYaEA - Tashqi savdo operatsiyalarining yagona elektron axborot tizimi.
Qarorda aytilishiga ko‘ra, meva-sabzavot mahsulotlari, xom-ashyo mahsulotlari va ayrim turdagi “maxsus tovarlar” eksporti uchun alohida talablar saqlanib qolingan.
“Yangi uzilgan meva-sabzavot mahsulotlari, uzum, poliz mahsulotlari, dukkaklilar, shuningdek, quritilgan sabzavot va mevalarni eksport qilishda alohida talablar belgilanadi”, — deyilgan qaror matnida.
Ushbu choralar tashqi savdo faoliyatini erkinlashtirish, eksport qilinadigan mahsulot hajmi, turini oshirish maqsadida amalga oshirilgan.
