TOShKENT, 10 noya — Sputnik. Rossiya temir yo‘llari 2019-yilgacha O‘zbekiston va Tojikistondan refrijerator tarkiblarda keltiriladigan meva-sabzavot import tashuvlari uchun 50 foizlik chegirma joriy etdi, deb xabar berdi RTYning "Gudok" gazetasi.
"O‘zbekiston va Tojikiston Respublikalaridan "O‘zbekiston temir yo‘llari" AJ va "Rohi ohani Tochikiston" DUKka qarashli refrijerator tarkiblarda meva-sabzavot mahsulotlarini Rossiya Federatsiyasiga temir yo‘l orqali to‘g‘ridan-to‘g‘ri import tashuvlar uchun mavjud tariflarga nisbatan 0,5 pasayuvchi koeffitsiyent joriy etilsin", — deyiladi boshqaruv qarorida.
Qayd etilishicha, mazkur koeffitsiyent ushbu davlatlarga tegishli refrijerator tarkiblardan foydalanishda RTY to‘lovlardan ozod etilgan holda amal qiladi.
"Koeffitsiyent o‘rnatilgan tartibda kuchga kiradi va 2018-yilning 31-dekabriga qadar amal qiladi", — deyiladi xabarda.
Boshqaruv yig‘ilishi bayonnomasi 3-noyabrda imzolangan va juma kuni e’lon qilingan. RTY ichki hujjat yurituviga ko‘ra, yuk tashish bo‘yicha temir yo‘l transporti xizmati uchun tariflarni pasaytirish haqidagi RTY boshqaruvi qarori u kompaniya rasmiy saytida e’lon qilinganidan 10 kun o‘tgach kuchga kiradi.
