TOShKENT, 26-iyun — Sputnik. Prezident Shavkat Mirziyoyev Ramazon hayiti kuni bemorlar holidan xabar oldi, deb xabar qildi O‘zbekiston prezidenti matbuot-xizmati.
O‘zbekiston prezidentining 2017-yil 20-iyundagi "Ramazon hayitini nishonlash to‘g‘risida"gi qaroriga binoan ushbu ayyom ezgulik, xayru saxovat ruhida o‘tmoqda. Keksalar, bemorlar holidan xabar olinmoqda.
Ana shu an’anaga muvofiq, Shavkat Mirziyoyev 26-iyun kuni Toshkent shahar ruhiy kasalliklar klinik shifoxonasini borib ko‘rdi.
Toshkent shahar ruhiy kasalliklar klinik shifoxonasi 1896-yilda qurilgan. Shifoxonada kasalliklar turi, davolash usullari, bemorlar holatiga ixtisoslashgan 18 bo‘lim tashkil etilgan. Klinik-biokimyo laboratoriyasi, rentgen, UTT, ensefalografiya, ekspertiza xonalari zarur vosita va malakali mutaxassislar bilan ta’minlangan. Shifoxona Toshkent tibbiyot akademiyasi, Toshkent pediatriya tibbiyot instituti, Toshkent vrachlar malakasini oshirish institutining ruhiy kasalliklar kafedralari uchun klinik baza hisoblanadi.
O‘zbekiston Respublikasi Vazirlar Mahkamasining 2013-yil 25-iyuldagi ruhiy-tibbiy xizmat faoliyatini takomillashtirishga oid qaroriga muvofiq, shifoxonada qurilish-rekonstruksiya ishlari amalga oshirilmoqda. 2015-2016 yillarda 4 yangi bino foydalanishga topshirildi. Ikki qavatli yana bir korpus qurilmoqda.
"Bemorlarga munosib sharoitlar yaratish kerak", dedi O‘zbekiston rahbari. Shifoxonaning tashqi va ichki ko‘rinishini tartibga keltirish, bu yerda ishlayotgan tibbiyot xodimlarining ijtimoiy himoyasini kuchaytirish, xususan, ularni uy-joy bilan ta’minlash bo‘yicha ko‘rsatmalar berildi.
Prezident, shuningdek, Mirzo Ulug‘bek tumanidagi "Muruvvat" uyida ham bo‘lib, bemorlar uchun yaratilgan sharoit bilan tanishdi.
Internat uyi 1979-yilda qurilgan.
Bugungi kunda bino va uning konstruktiv elementlarining texnik holati ta’mirtalab. Davlatimiz rahbariga mazkur internat hududini kengaytirish va qo‘shimcha binolar qurish loyihasi haqida ma’lumot berildi.
"Ulug‘ ayyom kunlari bunday savob ishlarni qilish, bemorlar holidan xabar olish har birimizning e’tiborimizda bo‘lmog‘i zarur", dedi Mirziyoyev.
Prezident mazkur shifoxona hududi yonida qo‘shimcha qurilish ishlari olib borish, kasalliklarning turiga qarab alohida binolar qurish va joylashtirish bo‘yicha ko‘rsatmalar berdi.
