TOShKENT, 1 avg — Sputnik. Bosh prokuraturada BMT Giyohvandlik va jinoyatchilikka qarshi Boshqarmasining Markaziy Osiyodagi Mintaqaviy vakolatxonasi bilan hamkorlikda Nelson Mandela xalqaro kuni munosabati bilan tashkil etilgan "Mahbuslar bilan muomalada bo‘lishninng minimal standart va qoidalari" mavzusida davra suhbati o‘tkazildi, deb xabar qildi Hukumat portali.
Videokonferensaloqa tizimi orqali davra suhbatida prokuratura va ichki ishlar organlarining hududiy tuzilmalari, shu jumladan jazoni ijro etish muassasalari, tergov hibsxonalari va vaqtincha saqlash hibsxonalarining xodimlari ham qatnashdilar.
Tadbirda mahbuslar bilan muomalada bo‘lish bo‘yicha BMTning minimal standartlari va qoidalari, mahbuslarning huquqlarini himoya qilishga qaratilgan qonunlarga rioya etilishi ustidan prokuror nazoratini amalga oshirish, jazoni ijro etish muassasalari monitoringi, xodimlarning malakasini oshirish va boshqa dozarb jihatlariga oid ma’ruzalar tinglandi.
Davra suhbati davomida Shavkat Mirziyoyev tomonidan tasdiqlangan 2017-2021 yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasida fuqarolarning huquq va erkinliklarini ishonchli himoya qilish kafolatlarini mustahkamlash, shu jumladan jinoiy jazolar va ularni ijro etish tartibini insonparvarlashtirish eng muhim vazifalardan biri sifatida belgilangani ta’kidlandi.
