TOShKENT, 7 yanv — Sputnik. KXDR yetakchisi Kim Chen In Janubiy Koreya bilan munosabatlarni yaxshilash uchun shart-sharoitlar yaratilishi zarurligi haqida bayonot qildi, deb xabar bermoqda Koreya markaziy telegraf agentligi.
Ta’kidlanishicha, bu yerda gap Pxenyan va Seul o‘rtasidagi munosabatlar normallashuvi haqidagina emas, balki millat yarashuvi va birikishi haqida ham bormoqda.
Ushbu yo‘nalishda ikkiyoqlama harakatlar orqaligina natijaga erishish mumkin, deb qayd qilingan bayonotda.
Shu bilan birga, Kim Chen Inning fikricha, ikki mamlakat yarashuvi — bu koreys millatining ichki masalasi, shu bois, Pxenyan va Seul boshqa davlatlarga yordam so‘rab murojaat qilmasligi darkor.
So‘nggi xabarlarga ko‘ra, KXDR Janubiy Koreya bilan oliy darajadagi muzokaralarni o‘tkazish uchun delegatsiya tarkibini tasdiqlagan.
Janubiy Koreya sal oldin ushbu uchrashuvga Milliy birlashuv masalalari bo‘yicha vazir Cho Mon Gun boshchiligidagi muzokarachilarni yuborishini ma’lum qilgan edi.
Eslatib o‘tamiz, Yangi yil bayrami munosabati bilan qilgan chiqishida KXDR yetakchisi Kim Chen In shimoliy koreyalik sportchilar Janubiy Koreyaning Pxenchxan shahrida o‘tkaziladigan Olimpiya o‘yinlarida ishtirok etishi mumkinligi haqida gapirgan edi.
Bu Janubiy Koreya tomonidan olqishlandi. Ikki mamlakat ikkiyoqlama munosabatlar va shimoliy koreyalik sportchilarning Olimpiadada ishtiroki masalasini muhokama qilish uchun 9-yanvar kuni oliy darajadagi muzokaralarni o‘tkazishga kelishib oldi. Muzokaralar ikki mamlakat o‘rtasidagi delimitatsiya qilingan hudud — Pxanmunj zonasida o‘tkaziladi.
