TOShKENT, 26 fev — Sputnik. "Asosiy maqsadimiz – xalqimizni rozi qilish, odamlarning farovon yashashi uchun barcha imkoniyatlarni yaratishdir, — dedi O‘zbekiston prezidenti. — Odamlar ishdan bo‘sh vaqtida bu yerga kelib maroqli dam olsa, farzandlari, nabiralarining sho‘x-shodonligini ko‘rsa, kulgularini eshitsa, hayotdan ko‘ngli to‘ladi, ruhi ko‘tarilib, yangi-yangi marralarga intiladi".
Davlat rahbari Qarshi shahridagi avvalgi "Nasaf" stadioni hududida barpo etilayotgan ko‘p tarmoqli suzish havzasi va zamonaviy dam olish majmuasi loyihasi bilan ham tanishdi.
4,7 gektar maydonda qurilayotgan 25x11 metr o‘lchamdagi ikki suzish havzasi hududda suv sporti turlarini yanada ommalashtirish, yoshlar o‘rtasida sog‘lom turmush tarzini qaror toptirish, kelajakda jahon va Olimpiya chempionlarini tarbiyalashga xizmat qiladi.
"Yoshlarning barkamol o‘sib-ulg‘ayishi uchun barcha sharoitlarni yaratishimiz kerak, — dedi Mirziyoyev. — Shunda ular Birinchi Prezidentimiz ta’kidlaganidek, bizdan ko‘ra kuchli, bilimli, dono va albatta, baxtli bo‘ladi".
Majmuani jihozlashda ilg‘or va tejamkor texnologiyalardan samarali foydalanish, kiyinish, yuvinish xonalarida barcha qulayliklarni yaratish bo‘yicha zarur ko‘rsatma va topshiriqlar berildi.
