Afg‘oniston prezidenti O‘zbekistonga tashrifga tayyorgarlik ko‘rmoqda

TOShKENT, 16 avg — Sputnik. Mirziyoyev taklifidan so‘ng Afg‘oniston prezidenti O‘zbekistonga tashrifga tayyorgarlik ko‘rmoqda. Bu haqda Afg‘onistonning O‘zbekistondagi elchisi Sayid Shahobuddin Timuriy "Jahon" axborot agentligiga O‘zbekiston mustaqilligining 26-yilligi munosabati bilan bildirgan qutlovi davomida aytib o‘tgan.

"Hozirda O‘zbekiston Respublikasi Prezidentining taklifiga binoan Afg‘oniston Islom Respublikasining Prezidenti Muhammad Ashraf G‘anining O‘zbekistonga rasmiy tashrifiga jiddiy tayyorgarlik ko‘rilmoqda. Mazkur tashrif doirasida xavfsizlik, temir yo‘l transporti, energetika, qishloq xo‘jaligi, yengil sanoat, sog‘liqni saqlash, kimyo va avtomobil sanoati kabi sohalarda hamkorlikni yanada rivojlantirishga qaratilgan 20 dan ziyod davlatlararo, hukumatlararo, vazirlik va idoralararo hujjatlarning imzolanishi ko‘zda tutilgan", — deb aytgan Shahobuddin Timuriy.

Elchi O‘zbekiston va Afg‘oniston o‘rtasida azaldan do‘stona va yaxshi qo‘shnichilik munosabatlari mavjudligini aytib, ikki mamlakat ahlini tarixiy savdo aloqalari, madaniy va an’anaviy urf-odatlar bog‘lab turishi, ikki xalq bitta darodan suv ichishini ta’kidlab o‘tgan.

"Albatta, mamlakatlarimiz rahbarlari o‘rtasida xalqaro anjumanlar doirasida o‘tkazilayotgan oliy darajadagi uchrashuvlar, turli vazirlik va idoralar o‘rtasida olib borilayotgan muzokaralar hamda kelishuvlar savdo va iqtisodiy, madaniy va gumanitar aloqalarning jadal sur’atlar bilan rivojlanishi va kengayishini ta’minlamoqda.

Shubhasiz, Afg‘oniston va O‘zbekiston rahbarlarining sa’y-harakatlari natijasida ikki mamlakat o‘rtasidagi aloqalar yuqori pog‘onaga ko‘tarildi, o‘zaro munosabatlarda yangi sahifa ochildi. Mavjud hamkorlikning jadallik bilan rivojlanib borishi xalqlarimiz do‘stlik rishtalarining yanada mustahkamlanishi va kengayishiga, o‘zaro ishonch va hurmat oshishiga xizmat qiladi. Jumladan, O‘zbekiston Respublikasi Prezidentining Afg‘oniston bo‘yicha maxsus vakili lavozimining ta’sis etilishi rasmiy Toshkentning diyorimizga bo‘lgan qiziqish va ehtiromi yuqori ekanidan dalolat beradi".

Elchi fursatdan foydalanib, mustaqillikning 26-yilligi munosabati bilan o‘zbek xalqiga samimiy tabriklarini va ezgu tilaklarini yo‘llagan.

"O‘lka farovonligi va yuksalishi yo‘lida amalga oshirilayotgan islohotlarning muvaffaqiyati elning g‘ayrat va shijoatiga bog‘liqdir, shu munosabat bilan O‘zbekiston rahbariyati va uning mehnatkash xalqiga bu borada katta zafarlar tilayman.

Bu shonli yo‘lda aslo tolmang, aziz birodarlar! Mustaqillik bayramingiz muborak bo‘lsin!"