O‘zbek qizlarini fohishalikka sotmoqchi bo‘lgan Savchenko aeroportda qo‘lga olindi

TOShKENT, 20 yanv — Sputnik.  Rossiya Federatsiyasining R.Savchenko ismli fuqarosi Samarqandlik qizlarni fohishalikka sotmoqchi bo‘lgan, deb xabar qilgan "Zarafshon" nashri.

Xabarda aytilishicha, qarindoshinikiga mehmonga kelgan Savchenko O‘zbekistondan noqonuniy yo‘llar bilan qizlarni olib chiqish va kelgusida ulardan fohisha sifatida foydalanish kabi jirkanch reja tuzadi. Samarqandlik Z.Bahodirova mo‘may pul evaziga qizlarni yollashda unga yordam berishga rozi bo‘ladi.

Rossiyaning Razan viloyatida yuqori haq to‘lanuvchi ofitsiantlik, sotuvchi-konsultantlik ishlari borligini aytgan Savchenko yolg‘on va’dalar bilan qizlarni o‘ziga og‘dira boshlaydi. Bu taklifga uch nafar yosh qiz xayrixohlik ko‘rsatadi.

"Mehmon" transport xarajatlarini o‘z zimmasiga  oladi va qizlarga ular kelajakda bu pullarni ishlab qaytarishlarini aytadi.

Nashrda yozilishicha, Samarqand huquq-tartibot organlari xodimlarining tezkor tadbiri tufayli bu jinoyat tezda fosh etilgan. Samarqand xalqaro aeroportida qizlarni Rossiyaga jo‘natayotgan  R.Savchenko qo‘lga olingan. Mazkur jinoyatda sherik bo‘lgan Z.Bahodirova ham ushlangan.

Jinoyat ishlari bo‘yicha Samarqand shahar sudi tomonidan ushbu kimsalarga nisbatan hukm o‘qilgan va tegishli jazo tayinlangan.