TOShKENT, 11-iyul — Sputnik. Davlat pensiyalarini tayinlash va to‘lash tartibi to‘g‘risidagi nizomga o‘zgartirish kiritildi, deb xabar bermoqda nuz.uz.
Nizomga ko‘ra, nogironlikning III guruhi belgilangan shaxslarga, shu jumladan 2011-yil 1-yanvardan keyin takroriy tibbiy ko‘rikdan o‘tkazilgandan so‘ng nogironlikning III guruhi belgilangan shaxslarga nogironlik pensiyasi to‘lanmaydi.
Biroq Vazirlar Mahkamasining "Fuqarolarning davlat pensiya ta’minoti tizimi yanada takomillashtirilishi munosabati bilan O‘zbekiston Respublikasi Hukumatining ayrim qarorlariga o‘zgartirish va qo‘shimchalar kiritish to‘g‘risida"gi qaroriga muvofiq, endilikda bu qoida Chernobil halokati oqibatida III guruh nogironligini olgan shaxslarga tatbiq etilmaydi.
Shunday qilib, Chernobil halokati oqibatida III guruh nogironligini olgan shaxslar pensiya olish huquqiga ega bo‘ldilar, deyiladi xabarda.
