Alisher Sa’dullayev yoshlarga yetakchi qanday bo‘lishi kerakligini o‘rgatdi

TOShKENT, 20 sen — Sputnik, Dilshoda Rahmatova. Xalq ta’limi vaziri o‘rinbosari Alisher Sa’dullayev o‘z jamoasiga eng sara yosh yetakchilarni jalb qilish maqsadida Samarqand shahrida yoshlar yetakchilari bilan uchrashib, o‘quv-seminar trening o‘tkazdi.

Eng yosh vazir o‘rinbosari sifatida ko‘p tilga olinadigan Sa’dullayev mashg‘ulotni O‘zbekiston prezidenti Shavkat Mirziyoyevning BMTda so‘zlagan nutqi haqida axborot berishdan boshladi. Sa’dullayev prezident BMT minbarida turib ham yoshlar haqida qayg‘urish bilan tilga olganini, mamlakatda yosh avlod uchun yaratilayotgan shart-sharoitlar haqida gapirganini e’tirof etib o‘tdi.

Prezident bizga juda katta imkoniyatlar berdi, u kishi biz, yoshlarga, ishondi, ishonch esa — bu katta qarz, buni unutmasligimiz kerak, deb ta’kidladi trening davomida Sa’dullayev.

So‘ngra prezident topshirig‘iga ko‘ra yoshlar takliflarini o‘rganayotganini ma’lum qildi. Samarqand — Sa’dullayev 3 kun ichida tashrif buyurayotgan yettinchi viloyat bo‘ldi.

Xalq vaziri o‘rinbosari yosh yetakchilarni ma’rifatsizlikka qarshi kurashishga chorladi. Ularga bolaning ichiga kirib, u bilan dildan suhbatlashishni maslahat berdi va "Bolaga jurnal bering, ko‘rasiz, shu birgina jurnal orqali uning dunyoqarashi shu bugunoq o‘zgarishi mumkin", — dedi.

Seminar davomida vazir o‘rinbosari o‘z shaxsiy tajribasidan ko‘plab misollar keltirdi.

Sa’dullayev yetakchilar yoshlarni o‘z ortidan ergashtira oladigan darajada bo‘lishi kerak, deya uqtirdi.

Eslatib o‘tamiz, Alisher Sa’dullayev 1994-yilning 11-iyulida Jizzax viloyatining Jizzax tumanida tug‘ilgan. Toshkent shahridagi Singapur menejmentni rivojlantirish institutini tamomlagan. Alisher Navoiy nomidagi milliy kutubxona qoshidagi "YES" klubida 2014-2015 yillar oralig‘ida yetakchilik qilgan.

2017 yilning iyul oyida O‘zbekiston prezidenti Shavkat Mirziyoyev tomonidan tajriba tariqasida, Xalq ta’limi vazirining yoshlar masalalari bo‘yicha o‘rinbosari etib tayinlagan.

Alisher Sa’dullayev O‘zbekiston Yoshlar ittifoqi (sobiq "Kamolot") ning IV Qurultoyida so‘zga chiqib, O‘zbekistonda yoshlarga til o‘rgatish istiqbollari haqidagi o‘z mulohazalarini Shavkat Mirziyoyevga yetkazgan edi.