12:15 18 Dekabr 2017
Efir
Zarubejnaya pressa

Oʻzbekistonda OAVni roʻyxatga olish tartibi soddalashtiriladi

© Sputnik/ fragolerosse
Jamiyat
Havola olish
103 0 0

Mass-media vakillariga jurnalistlik faoliyatini amalga oshirishda qoʻshimcha huquqlar beriladi

TOSHKENT, 7 dek – Sputnik. 6 dekabr kuni oʻtkazilgan Oʻzbekiston Respublikasi Oliy Majlisi Qonunchilik palatasining navbatdagi majlisida ommaviy axborot vositalari faoliyatiga, shuningdek jurnalistlarning kasb faoliyatini himoya qilishga daxldor qonun loyihalari birinchi oʻqishda koʻrib chiqildi. Bu haqda Oliy Majlis Qonunchilik palatasining axborot xizmati xabar qildi.

Deputatlar oʻz ishini "Ommaviy axborot vositalari toʻgʻrisida"gi Oʻzbekiston Respublikasi Qonuniga oʻzgartish va qoʻshimchalar kiritish haqida"gi qonun loyihasini koʻrib chiqishdan boshladilar.

Parlament vakillari fikriga koʻra, qonunning qabul qilinishi ommaviy axborot vositalarining faoliyati erkinligini, axborotlardan erkin foydalana olishini, ularni davlat organlarining gʻayrihuquqiy qarorlaridan, mansabdor shaxslarning harakatlari yoki harakatsizligidan himoya qilishni taʼminlovchi huquqiy, iqtisodiy va tashkiliy shart-sharoitlarni yaratishga xizmat qiladi.

OAVni roʻyxatdan oʻtkazish toʻgʻrisidagi arizalarni koʻrib chiqish jarayonini soddalashtirish, shuningdek internet global tarmogʻidagi veb-saytlarni OAV sifatida roʻyxatdan oʻtkazish tartibini takomillashtirish muhim jihat hisoblanadi.

Bundan tashqari, jurnalistlar va ijodiy jamoalarni ularga soliqlar va boshqa majburiy toʻlovlar boʻyicha imtiyozlar va preferentsiyalar taqdim etish, moliyaviy va ijtimoiy yordam koʻrsatish yoʻli bilan davlat tomonidan qoʻllab quvvatlashning huquqiy mexanizmlari belgilanadi. Moddiy-texnika bazasini mustahkamlash, fondlar faoliyatini tashkil etish, shuningdek tahririyatlar xodimlarini qayta tayyorlash va ularning malakasini oshirish masalalariga alohida eʼtibor qaratiladi.

Shundan soʻng "Jurnalistlik faoliyatini himoya qilish toʻgʻrisida"gi Oʻzbekiston Respublikasi Qonuniga oʻzgartish va qoʻshimchalar kiritish haqida"gi qonun loyihasi koʻrib chiqildi.

Shu narsa taʼkidlandiki, ushbu qonun loyihasini qabul qilishning dolzarbligi jurnalistlik faoliyati erkinligini, hozirgi zamon xalqaro tajribasini va qonun hujjatlarini hisobga olgan holda jurnalistlarning huquqiy maqomi, akkreditatsiya qilish instituti tushunchasi hamda akkreditatsiya qilingan jurnalistlarning huquqlari belgilanishini taʼminlovchi huquqiy, iqtisodiy va tashkiliy shart-sharoitlar yaratish zarurati bilan bogʻliqdir.

Deputatlarning taʼkidlashicha, qonun loyihasi davlat organlari faoliyatining ochiqligini taʼminlashda hamda jamoat manfaatlariga molik dolzarb masalalarni yoritishda jurnalistlarning nufuzini oshirish maqsadini koʻzlaydi. Mass-media vakillariga jurnalistlik faoliyatini amalga oshirishda qoʻshimcha huquqlar beriladi.

Qonun loyihalarini ishlab chiqish jarayonida manfaatdor davlat organlari, jamoat tashkilotlari, fuqarolarning oʻzini oʻzi boshqarish organlari vakillari, shuningdek soha olimlari va mutaxassislari ishtirokida muhokama oʻtkazildi. Loyihalarni takomillashtirishga doir aniq takliflar bildirildi. Shuningdek hujjatlar regulation.gov.uz portalida omma uchun muhokamaga qoʻyildi.

Muhokama yakunlariga koʻra deputatlar mazkur qonun loyihalarini kontseptual jihatdan maʼqullab, birinchi oʻqishda qabul qildilar. Masʼul qoʻmitaga kelib tushgan takliflarni inobatga olgan holda ushbu hujjatlarni ikkinchi oʻqishda koʻrib chiqish uchun tayyorlash topshirildi.

Asosiy mavzular