TOShKENT, 25-iyul — Sputnik. Ilgariroq, 29-iyul kuni Dushanbedagi "Axorun" amfiteatrida o‘zbek va tojik bokschilari o‘rtasida professional boks kechasi o‘tkazilishi haqida xabar berilgandi. Tojikiston professional boks federatsiyasining ma’lum qilishicha, mazkur tadbir bekor qilingan.
Dushanbe shahri hokimiyatining federatsiyaga yo‘llagan maktubidan ma’lum bo‘lishicha, "Axorun" madaniy-dam olish muassasasi (amfiteatr) faqatgina madaniy-ko‘ngilochar tadbirlar o‘tkazish uchun mo‘ljallangan bo‘lib, professional bokschilar ishtirokidagi tadbirni sport zalida o‘tkazish tavsiya qilingan.
Shu sababli O‘zbekiston va Tojikiston bokschilari o‘rtasidagi boks-shousi o‘tkazilmaydigan bo‘ldi. Federatsiyaning ma’lum qilishicha, hozirda ushbu sport tadbirini boshqa maskanda o‘tkazishni tashkillashtirish ishlari olib borilmoqda.
Boks shousida Sherali Mamadaliyev (Tojikiston) – Maqsud Jumayev (O‘zbekiston), Baxtiyor Mirzomuhammad (Tojikiston) – Alisher Habibullayev (O‘zbekiston) va Asror Vohidov (Tojikiston) – Humoyun Rustamov (O‘zbekiston) bir-birlari bilan kuch sinashishlari lozim edi.
