TOShKENT, 28 apr — Sputnik. AQSh prezidenti Donald Tramp Reyter nashriga bergan intervyusida, KXDR bilan "katta mojaro" bo‘lishi xavfi mavjudligi haqida gapirdi, ammo shaxsan o‘zi kelishmovchiliklarni diplomatik yo‘l bilan hal etish tarafdori ekanligini qo‘shimcha qildi, deb xabar qiladi RIA Novosti.
"Biz muammolarni diplomatik yo‘l bilan hal etishni xohlardik, ammo bu juda og‘ir", — deb qo‘shimcha qilgan Amerika yetakchisi.
Tramp, shuningdek, KXDR atrofidagi muammolarni bartaraf etishda Xitoy qanday rol o‘ynayotganiga alohida urg‘u berdi va XXR Raisi Si Szinpin "qo‘ldan kelgancha" harakat qilayotganini ta’kidladi.
Shimoliy Koreya yetakchisi Kim Chen Inning o‘zini tutishini oqilona deb hisoblaysizmi, degan savolga javob berar ekan, Tramp, taxminlardan kelib chiqadigan bo‘lsak, u aql bilan harakat qilayapti, deya javob bergan. Tramp, shuningdek, Kim Chen In hokimiyat tepasiga juda yosh vaqtida kelganligiga e’tibor qaratgan.
"Uning aqlliligiga umid qilaman", — deb ta’kidlagan AQSh prezidenti.
Qo‘shma Shtatlar KXDR muammosini hal etishda Xitoyga katta umid bog‘lamoqda. Aprel oyi boshlarida XXR Raisi Si Szinpin AQShga safari uyushtirib, Donald Tramp bilan muzokaralar o‘tkazgan edi.
Aprel oyi boshida AQSh Koreya yarimoroli hududiga atomli avianoses — "Karl Vinson" boshchiligidagi jangovor guruhni yubordi. "Karl Vinson" KXDR qirg‘oqlari yaqinida bir oycha bo‘lishi kutilmoqda.
Bundan tashqari, Janubiy Koreya o‘z hududida Amerikaning raketalarni tutib qoluvchi THAAD tizimini joylashtirapti. AQSh bu tizim joylashtirilishini Pxenya tomonidan bo‘layotgan tahdidlar bilan izohlagan.
Bizning Telegramdagi o‘zbekcha kanalimizga obuna bo‘ling va eng yangi xabarlarni birinchi bo‘lib o‘qing.
