TOShKENT, 24 noya — Sputnik. Turkiya adliya vazirligi Fathulloh Gulen tashkiloti (FETO) a’zolari ishini ko‘rib chiqayotgan Anqara jinoiy sudining so‘roviga asosan FETO tashkilotining 45 vakilini Turkiyaga topshirish talabi bilan O‘zbekiston va yana 21 davlatga so‘rov jo‘natadi. Bu haqda Anadolu axborot agentligiga tayanib Sputnik Qirg‘iziston xabar berdi.
Agentlikning xabariga ko‘ra, FETO tarafdorlarini topshirish bo‘yicha eng ko‘p so‘rov AQShga jo‘natiladi – 15. Buyuk Britaniya va Germaniyaga 4tadan so‘rov jo‘natiladi.
Shuningdek, Albaniya, BAA, Belgiya, Burkina-Faso, Norvegiya, Niderlandiya, Malta, Isroil, Kamboja, Madagaskar, Mozambik, Tailand, Togo, JAR, Misrdan "gulenchilar"ni topshirish so‘raladi.
Markaziy Osiyo davlatlari orasida O‘zbekistondan tashqari Qirg‘iziston, Qozog‘iston va Turkmaniston rahbariyatlariga yo‘llanadi.
AQShning Pensilvaniya shtatida yashovchi Fathulloh Gulen Turkiya hukumati tomonidan 2016-yil 16-iyuliga o‘tar kechasi mamlakatda davlat to‘ntarishi sodir etishga urinishda ayblangan. Gulenning o‘zi esa bu ayblovni rad etib keladi.
