TOShKENT, 15 dek — Sputnik. Ispaniyaning Barselona shahri sudi mashhur opera qo‘shiqchisi Monserrat Kabalyeni tovlamachilikda ayblab, olti oy qamoq jazosiga hukm qildi, RIA Novosti ABC gazetasi xabariga ko‘ra.
Qo‘shiqchi o‘ziga qo‘yilgan aybni tan oldi, ammo sud zaliga tashrif buyurmadi. Sog‘lig‘i yomonlashganini bahona qilib, videoaloqa orqali ko‘rsatma berdi.
Qo‘shiqchi 2010-yil jismoniy shaxs sifatida Ispaniya g‘aznasiga soliq to‘lamaganlikda ayblanmoqda. Gap shundaki, Kabalye rasman Andorra fuqarosi, shu bois, Ispaniyada jismoniy shaxs sifatida soliq to‘lamagan. Prokuratura xodimlari tomonidan qo‘shiqchi aslida Barselonada yashashi va soliq to‘lamaslik uchungina Andorrani “turar joyi” sifatida saqlab turganligi fosh qilindi.
Natijada Kabalye o‘z aybiga iqror bo‘ldi. Belgilangan 250 ming yevro jarima, shuningdek, olti oylik qamoq jazosiga ham e’tiroz bildirmadi.
Qo‘shiqchi shu kunlarda Ispaniya g‘aznasiga 508 ming yevro mablag‘ to‘ladi. Monserratga qo‘yilgan ayb uchun ikki yilgacha qamoq jazosi belgilanishi mumkin. Qo‘shiqchining muqaddam jinoiy javobgarlikka tortilmagani hisobga olinsa, jazo shartli ravishda belgilanadi, degan taxminlar ham yo‘q emas.
