TOShKENT, 27 yanv — Sputnik. Buyuk Britaniyaning Chief Corporate Solutions LP kompaniyasi O‘zbekistonda yangi sement zavodini ishga tushiradi, deb xabar qildi Sputnik muxbiriga Iqtisodiyot vazirligidan manba.
Ta’kidlab o‘tish joizki, Qoraqalpog‘istonda sement ishlab chiqarishni yo‘lga qo‘yish masalasi oxirgi besh yil davomida juda ko‘p muhokama qilindi. Turkiya, Germaniya va Yaqin Sharq mamlakatlari investorlari bu masalaga qiziqish bildirishgan edi.
"Qoraqalpog‘iston — O‘zbekistonning eng shimoliy hududiga kiradi. Sement zavodlarining olisda joylashuvi Qoraqalpog‘istonga transportirovka qilinadigan sement narxi qimmatlashishiga ta’sir ko‘rsatmay qolmasdi. Shu bilan birga, Qoraqalpog‘iston – Qozog‘iston, Rossiya va Turkmaniston singari mamlakatlarning eksport bozoriga chiqish uchun nihoyatda qulay hudud sanaladi", — dedi manba.
Rejaga muvofiq, O‘zbekistonda 2020-yilga kelib yiliga 16,7 million tonna sement ishlab chiqarish ko‘zda tutilgan.
Hozirda mamlakatda sakkizta sement zavodi ishlab turibdi. Qoraqalpog‘istondan tashqari, Jizzax, Qashqadaryo, Surxondaryo va Toshkent viloyatlarida ham yangi zavodlar qurilishi ta’kidlanmoqda.
