Madaniyat

Sitora Farmonova: Goʻzal oqqushga aylangan “irkit oʻrdakcha”

© Mirtoxir Gulyamov«Aziya MIX» jamoasi yulduzi Sitora Farmonova.
«Aziya MIX» jamoasi yulduzi Sitora Farmonova. - Sputnik Oʻzbekiston
"Quvnoqlar va zukkolar"ning mashhur «Aziya MIX» jamoasi tarkibi oʻzgardi. Xushchaqchaq va zukko bishkekliklar safiga buxorolik xonanda va aktrisa – Sitora Farmonova kelib qoʻshildi. Sputnik sayti Sitora bilan bogʻlanib, oddiy qiz qanday qilib superyulduz darajasiga erishgani haqida bilib oldi.

Xonanda, aktrisa, KVN “yulduzi”… Sitora, bu sizning  serqirra inson ekanligingizdan dalolat. Ayni vaqtda mana shu uch taʼrifning qay biri siz uchun muhim?

Karyeramni aktrisa sifatida boshlaganman. Hozir ham filmlarda suratga tushib kelaman. Shu bilan birga Oʻzbekistonda hamda MDH davlatlarida xonanda sifatida ham faoliyat yuritaman. QVZ — men uchun ajoyib bir oʻyin. QVZchilar orasida doʻstlarim juda koʻp. Men xonandalik QVZdagi faoliyatimdan muhimroq, deb ayta olmayman. Chunki har bir soha men uchun alohida ahamiyat kasb etadi. Lekin QVZga alohida mehr qoʻyganim rost.

«Aziya MIX»ga yaqinda qoʻshildingiz, shundaymi?

Bu voqea oʻtgan yil — Sochidagi festival chogʻida roʻy berdi. Bunga qadar komanda kapitani Eldiyor Kenensarov bilan qirgʻizistonning “Obщaga” serialida birga ishlagan edik. Toʻrt yil muqaddam u meni filmda bosh rolga taklif qilgan edi. Shundan soʻng doʻstlashib ketdik, oilaviy bordi-keldimiz bor. Kunlarning birida esa iqtidorli, xushchaqchaq insonligimni tushunib yetdi. Qoʻngʻiroq qilib, jamoaga taklif qildi.

© SERGEY ANDRIANOVSitora Farmonova Qirgʻizistonning "Aziya MIX" jamoasi oʻyinchilari bilan
Sitora Farmonova Qirgʻizistonning Aziya MIX jamoasi oʻyinchilari bilan   - Sputnik Oʻzbekiston
Sitora Farmonova Qirgʻizistonning "Aziya MIX" jamoasi oʻyinchilari bilan

Ommadan qoʻrqmasligingiz rostmi?

Ha. Xalq qarshisidagi har bir chiqishimdan quvvat olaman. Yanada tetiklashaman.

Yaʼni, bu jarayon suratga olish maydonida ishlashdan ham maroqliroq, demoqchimisiz?

Albatta! Sahnada turib xursandchilik, mehr toʻla nigohlarni koʻraman — bu juda maroqli. Insonni tetiklashtiradi. Sizga qadalgan, “yonib” turgan koʻzlarda mehr mujassam boʻladi. Siz uchun qaygʻurishayotganini his qilib, koʻrib turasiz. Bunday paytdagi holatimni soʻz bilan ifodalab berolmayman.

Hazil-mutoyiba toʻqish qiyinmasmi?

QVZchilar bilan yashab, muloqotda boʻlsangiz, ular har qadamda hazil-mutoyiba qilishlariga guvoh boʻlasiz. Toʻgʻri, boshida sal qiyin boʻldi. Oʻylanib qolardim: mening qoʻlimdan kelarmikin, deb. Hozir esa har bir gapim hazilga aylanadi.

Demak, sizga KVNdagi muhit taʼsir koʻrsatibdi-da?

Yalla guruhi rahbari Farrux Zokirov. - Sputnik Oʻzbekiston
Madaniyat
Modani rasm qiluvchi “Yalla” guruhi yoxud Farrux Zokirovning yosh sanʼatkorlarga oʻgiti

Ha. Hazillarni yigitlarimizning oʻzlari yozishadi. Bu jarayon mening koʻz oldimda roʻy beradi. Bunga koʻnikib ketganman.

QVZdagi ishtirokingizdan keyin yangi takliflar boʻlgandir?

Hozircha bu sir. Ammo sizga aytaman: meni TNT kanaliga taklif qilishyapti. Bu haqda hozircha batafsil gapirishni xohlamayman. Oldinda meni yangi loyihalar, filmlar va sʼyomkalar kutmoqda. Rejalarim bisyor.

Oynai-jahonga qanday qilib tushib qolgansiz?

Birinchi marta qirgʻiz ijodkorlari tomonidan suratga olingan «Obщaga» seriali orqali. Ushbu serialga tasdiqlanishim juda qiziq kechgan. Serialga kasting Toshkentda oʻtkazilgan edi. Gap shundaki, sinovga borishim kerak boʻlgan kun dugonam qoʻngʻiroq qilib, yigiti ustidan arz qilishni boshladi. Keyin dugonamning ustidan qilingan arzni yigitidan ham eshitishga majbur boʻldim. Xullas, bu holat tufayli asablarim tarang holatga kelgan edi… 

Xonanda Shahzoda. - Sputnik Oʻzbekiston
Madaniyat
Shahzoda: “Ijodimda tanaffusga vaqt yoʻq”

Kasting boʻlib oʻtayotgan joyga keldim. Mendan biror holatni koʻrsatib berishni soʻrashdi. Men esa nima koʻrsatishni bilmayman. Asablarim tarang emasmi… Kasting murakkab hayot tufayli hamisha aziyat chekuvchi yuvosh qiz roli uchun oʻtkazilayotgan edi. Ammo meni koʻrgan ijodkorlar xayolida boshqa obraz paydo boʻlgan. 

Ular oʻzaro maslahatlashgach, menga: “Sitoraxon, biz boshqa bir obrazni izlab kelgan edik. Ammo hozir sizda ikkinchi obrazni koʻrdik. Rozimisiz, ijro etishga?” deb soʻrashdi. Shunday qilib, tamomila boshqa obrazga tayyorlangan boʻlsam-da, oʻzim kutmagan rolni qoʻlga kiritganman.

Dugonangiz va uning yigitiga minnatdorchilik bildirdingizmi?

Albatta! Ular hozirgacha menga muxlislik qilib, qoʻllab-quvvatlab kelishadi. Aytgancha, juftlik ushbu kastingdan keyin yarashib olgan edi.

Sanʼat kishisi ekanligingizni qachon anglagansiz?

2000 yilda. Dadamning rejissyor oʻrtogʻi bir xonandaning qoʻshigʻiga klip suratga olayotgan edi. Mendan shu klipda suratga tushishni soʻradi. Oʻn olti yoshdaman, dadam safarga ketgan, albatta, rozi boʻlganman. Shu klipdan keyin meni bir filmga taklif qilishdi. Epizodik rolni ijro etdim. Ilk rolim – kichik epizodik rol boʻlgan. Ikkinchi rolim esa – katta rol. Hozirga qadar hisobimda 29ta bosh rol bor.

Buxoroda oʻtgan bolalik davringizni qanday yodga olasiz?

Buxoroni eslasam, yuzimga tabassum yuguradi. Bolaligimning eng shirin lahzalari Buxoroda oʻtgan. Toshkentga koʻchib oʻtganimizda 13 yashar qizaloq edim. Toʻgʻrirogʻi, kichkinaligimda oʻgʻil bolaning oʻzi boʻlganman. Dadamdan qoʻgʻirchoq emas, toʻpponcha, avtomat va velosiped olib berishlarini iltimos qilardim. Bitta dugonam boʻlardi, qolgan oʻrtoqlarim oʻgʻil bolalardan iborat edi. Faqat oʻgʻil bolalar bilan doʻstlashib, quvlashmachoq, otishmachoq oʻynardim.

Maktabdan kelishimga, uy xizmatchisi kiyimlarimni almashtirishga ulgurmasa, maktab formasida koʻchaga yugurib ketardim. Har bitta ariqqa kirib chiqardim. Dadamlar: «Qizim, kattarganingda goʻzal, latofatli boʻlasan”, derdilar. Dadamning soʻzlari yoshim yigirmadan oʻtganda amalga oshdi. Hech kim mendan bunday oʻzgarishni kutmagan.

Yoʻldosheva Lola Ravshanbekovna. Xonanda. - Sputnik Oʻzbekiston
Madaniyat
Lolaga litsenziyasi qaytarildi

Dadam meni hozirgacha “irkit oʻrdakcha” deb chaqiradilar. “Kichkinaligingda, bir kun kelib bu qadar oʻzgarishingni hech kim bilmagan edi. Mana, qanotlaringni keng yozib, huriliqo oqqushga aylanding” deydilar u kishi. Men hech qachon nozik boʻlmaganman. Hamisha daraxtlarga osilib, shox ustida uyquga ketib qolib, qulab tushgan vaqtlarim ham boʻlgan. Oʻsha paytlardan qolgan esdalik – chandiqlar buning guvohi. Koʻchadan albatta, yaralanib, qaytib kelardim. Qoʻlimni bir necha bor sindirganman. Ayam “bu feʼl-atvori bilan men uni qanday turmushga uzataman”, deb havotir olardilar faqat. Mana, Sitora oʻzgarishi ham mumkin ekan…

Hozir ota-onangiz siz bilan faxrlanishsa kerak?

Albatta! Ular har bir gʻalabamni, har bir qoʻshigʻimni mehr bilan qarshi oladilar, qoʻllab-quvvatlaydilar, mendan maslahatlarini ayamaydilar. Ammo koʻpincha: “Undaymas, bunday qilishingi kerak edi” deb tanbeh ham beradilar. Ota-onam — mening suyangan togʻim.

Buxoroga borganingizda sizni gullar, shirinliklar va orkestr bilan qarshi olishsa kerak?

Ha. Lekin orkestr bilanmas, gullar bilan. Buxoro — ona shahrim. Katta xursandchilik bilan kutib olishadi.

Saytimiz mushtariylariga tilaklaringiz?

Barcha-barcha muxlislarimni menga boʻlgan mehr-muhabbatlari uchun minnatdorchilik bildiraman. Oʻzbek xalqi – ezgulikka intiluvchi, yaxshilik istaguvchi xalq. Xalqimning ana shu bebaho jihatini juda qadrlayman. Har bir oʻzbek xonadoniga yorugʻlik, iliqlik tilayman. Muxlislarim yuzlaridan tabassum arimasin. Ularga barcha ishlarida ulkan zafarlar tilayman!

 

Yangiliklar lentasi
0
Avval yangilariAvval eskilari
loader
LIVE
Zagolovok otkrыvayemogo materiala