TOShKENT, 23 apr — Sputnik. Buyuk Britaniyada Barak Obamaning mamlakat Yevropa Ittifoqi tarkibida bo‘lishi zarurligi haqidagi bayonotini qahr-g‘azab bilan kutib olishdi, deya xabar qiladi RIA Novosti.
Buyuk Britaniya Yevropa Ittifoqi tarkibidan chiqishi tarafdori bo‘lganlar esa Barak Obamani tanqidlarga ko‘mib tashlashdi. Shu jumladan, UKIP partiyasi yetakchisi Nayjel Faraj Reyter agentligiga Barak Obama "har bir ishga burun suqmasligi lozimligi” haqida gapirdi. "Bu zo‘ravonlarcha suqilishdan boshqasi emas. U Vashingtondan chiqmasa, foydaliroq bo‘lardi", — dedi siyostachi FoxNews telekanaliga.
London meri Boris Jonson esa The Sun nashriga Vashingtonning “ikkiyuzlamachiligi” haqida bayonot qilgan. Uning so‘zlariga ko‘ra, AQSh Britaniyani “demokratiyaning bir qismini o‘zgalar nazoratiga topshirishga chaqirmoqda”.
“Obama, aytganimni qil, qilganimni qilma” kabilida ish tutmoqda, deb ta’kidladi Jonson.
CNN telekanali ma’lumotlariga ko‘ra, Obama, shuningdek, ijtimoiy tarmoq foydalanuvchilari nafratiga duchor bo‘lgan. Ular AQSh prezidentini “chaqirilmagan maslahatchi”, deb atab, AQShni Britaniya imperiyasi tarkibiga qaytarish haqida taklif bildirganlar. Shuningdek, Britaniyaning YeI tarkibida qolishi tarafdorlari bo‘lganlar ham Obamaning homiylarga xos ohangi ularga manzur bo‘lmagani haqida gapirishgan.
Eslatib o‘tamiz, Buyuk Britaniyaning YeIga a’zoligi masalasi yuzasidan referendum joriy yilning 23-iyun sanasida o‘tkazilishi rejalashtirilgan.
