Siyosat

Xvan Ge An: Oʻzbekistonning jahon maydonidagi maqomi ogʻishmay yuksalib bormoqda

© AFP / JUNG YEON-JEJanubiy Koreya Bosh vaziri Xvan Ge An
Janubiy Koreya Bosh vaziri Xvan Ge An - Sputnik Oʻzbekiston
Koreya Respublikasi hukumat rahbari Xvan Ge An Oʻzbekistonning jadal taraqqiyoti Janubiy Koreyani quvontirayotgani haqida gapirdi.

TOSHKENT, 20 may — Sputnik. Bundan sal oldin Koreya Respublikasi Bosh vaziri Xvan Ge Anning mamlakatimizga rasmiy tashrifi kutilayotgani haqida xabar qilgan edik. Oʻz tashrifi davomida Janubiy Koreya hukumatining rahbari "Jahon" AA bergan intervyusini eʼtiboringizga havola qilamiz.

- Janob Bosh vazir, Siz Oʻzbekistonga rasmiy tashrifingiz davomida boʻlib oʻtadigan muzokara va uchrashuvlardan nimalarni kutayotirsiz va Oʻzbekiston — Janubiy Koreya hamkorligi istiqbollarini qanday baholaysiz?
— Men Buyuk ipak yoʻlining yuragi hisoblanadigan va bugungi kunda Markaziy Osiyoning transport-logistika xabi sifatida yana oʻzini namoyon etayotgan ajoyib mamlakatingizda boʻlishimdan juda quvonaman.
Tashrif dasturida Qoraqalpogʻistondagi Ustyurt gaz-kimyo majmuasining qurilishi tugallanishi hamda Toshkentda Koreya madaniyati va sanʼati uyi barpo etilishining boshlanishi marosimlarida ishtirok etish koʻzda tutilgan.
Bu loyihalar davlatlarimiz rahbarlarining katta jonbozliklari va qoʻllab-quvvatlashlari tufayli muvaffaqiyat bilan voqelikka aylandi va ular ikki mamlakat oʻrtasidagi mustahkam doʻstlik va oʻzaro ishonchga asoslangan munosabatlarning ajoyib namunasi hisoblanadi.

Transport-logistika majmuasi - Sputnik Oʻzbekiston
Iqtisod
Oʻzbekiston va Janubiy Koreya oʻrtasida savdo-sotiq hajmi 1,2 mlrd $ boʻldi
Shuni alohida taʼkidlash joizki, diplomatiya munosabatlari oʻrnatilgan 1992 yildan buyon oʻtgan davr oraligʻida oliy darajada 14 ta uchrashuv boʻlib oʻtdi. Turli yoʻnalishlarda yaqin strategik sheriklik oʻrnatildi va mustahkamlanmoqda. Shu davr ichida oʻzaro tovaralmashuvi 500 barobardan ziyodga koʻpaydi.
Bugungi kunda Oʻzbekiston Koreya Respublikasining Markaziy Osiyo mintaqasidagi eng yirik savdo sherigi hisoblanadi, mamlakatimiz esa Oʻzbekistonning sarmoyaviy sheriklari roʻyxatida yetakchi oʻrinlardan birini egallaydi. Koʻrib turganimizdek, davlatlarimiz oʻrtasidagi oʻzaro hamkorlik ogʻishmay rivojlanib bormoqda va u katta istiqbollarga egadir.
- Hozirgi paytda turli sohalardagi Oʻzbekiston — Koreya qoʻshma loyihalari muvaffaqiyat bilan amalga oshirilmoqda. Surgʻil konida barpo etilgan Ustyurt gaz-kimyo majmuasi ulardan biri hisoblanadi. Ushbu majmuaning noyobligi va ikki mamlakat uchun ahamiyati nimada deb oʻylaysiz?
— Ushbu sanoat giganti qurilishining yakunlanishi marosimida ishtirok etish menga katta mamnuniyat bagʻishlaydi. Uni Koreya-Oʻzbekiston iqtisodiy hamkorligining yangi “chaqirimlarni koʻrsatadigan ustuni” deb atash mumkin. U oʻzining koʻlamlari bilan haqiqatan ham mega-loyihadir: yotqizilgan sarmoya hajmi qariyb 4 milliard AQSH dollarini tashkil etadi.
Bu loyiha hamkorlikning yangi modeli boʻlgani tufayli ham alohida qimmatga egadir. U xom ashyo resurslari eksportidan qoʻshma ishlab chiqarishga oʻtishni va yuqori qoʻshimcha qiymatli mahsulotlarni tashqi bozorlarga yetkazib berishni koʻzda tutadi.
Janubiy Koreya Respublikasi bayrogʻi - Sputnik Oʻzbekiston
Iqtisod
Janubiy Koreya Oʻzbekistonning 24 korxonasida davlat ulushini sotib oladi
Shuni alohida qayd etishni istardimki, 2014-yil aprelida shaxsan Oʻzbekiston Respublikasi Prezidenti Islom Karimov Ustyurt gaz-kimyo majmuasiga keldilar. Biz bunday qiziqish va eʼtiborni katta mamnuniyat bilan qabul qilamiz. Bu loyihaning amalga oshirilishiga jalb etilgan ishchilarga ham koʻtarinki ruh bagʻishlaydi.
Obʼyekt qurilishi yakunlanishiga bagʻishlangan marosimda Janubiy Koreya va Oʻzbekiston hukumatlari vakillarining ishtiroki bu loyihaga qaratilayotgan alohida eʼtibordan dalolat beribgina qolmay, tomonlarning oʻzaro manfaatli aloqalarni kengaytirishga boʻlgan qatʼiy xohish-irodasi va intilishini ham koʻrsatadi. Kelajakda ham bunday tashabbuslarni amalga oshirish, shuningdek, Qandim gazni qayta ishlash majmuasining barpo etilishida ishtirok etish rejalashtirilmoqda.
- Mamlakatlarimiz oʻrtasidagi sarmoyaviy hamkorlik neft-gaz industriyasi bilan cheklanib qolmaydi. Marhamat qilib ikki tomonlama oʻzaro manfaatli boshqa loyihalar xususida ham soʻzlab bersangiz.
— Darhaqiqat, oʻzaro hamkorligimiz energetika sohasidagina emas, balki transport, logistika, axborot-kommunikatsiya texnologiyalari, qishloq xoʻjaligi, sogʻliqni saqlash, taʼlim, madaniyat sohalarida ham amalga oshirilayotgani maʼlumdir. Shuni qayd etish quvonarliki, bugungi kunda mamlakatingizda 400 dan ziyod Koreya kompaniyalari faol ish olib bormoqda.
2009-yildan buyon muvaffaqiyat bilan hayotga tadbiq etilayotgan Navoiy shahar aeroportini modernizatsiyalash, Tollimarjon IESni texnik qayta jihozlash, Koreya-Oʻzbekiston elektron hukumat markazining tuzilishi loyihalarini alohida qayd etishni istar edim. Joriy yildan eʼtiboran agroinshootlar qurilishi, axborot-kommunikatsiya texnologiyalaridan foydalangan holda umumiy suv taqsimlash bosh rejasining ishlab chiqilishi va boshqalarni koʻzda tutadigan qishloq xoʻjaligi sohasidagi loyihalarni amalga oshirish boshlandi.

Oʻtgan yilning noyabrida Toshkentda boʻlib oʻtgan Xalqaro investitsiyaviy forum doirasida oʻzbekistonlik va koreyalik sheriklar oʻrtasida qariyb 1 milliard AQSH dollariga teng miqdordagi bitim va memorandumlar tuzildi.

Bizning hukumatimiz ilgʻor texnologiya va ilgʻor boshqaruv uslublariga ega boʻlgan Koreya kompaniyalariga koʻmak koʻrsatish, Oʻzbekistonning sanoat salohiyatini oshirish boʻyicha loyihalarning hayotga tadbiq etilishida ishtirok etish uchun bor imkoniyatlaridan foydalanadi.
- Shu oʻrinda biz Navoiy, Jizzax va Angrenda yaratilgan maxsus iqtisodiy hududlarda Janubiy Koreya sarmoyadorlari ishtirokidagi biznes-loyihalarning amalga oshirilishiga doir batafsil maʼlumotlarni olishni istar edik.
— Koreya Respublikasi Oʻzbekistonning eng yirik sarmoyadorlaridan biri sifatida oʻzbek iqtisodiyotiga katta mablagʻ yotqizdi. “Navoiy” erkin industrial-iqtisodiy, “Jizzax” va “Angren” maxsus industrial zonalarida oʻz faoliyatini yoʻlga qoʻygan 6 ta Koreya kompaniyasi qariyb 60 million AQSH dollari miqdorida sarmoya kiritdi. Ular avtomobillar uchun asosiy ehtiyot qismlar, pardoz-andoz, yoritish uskunalari va boshqa mahsulotlarni ishlab chiqarishmoqda. Bulardan tashqari, «Navoiy» aeroporti bazasida tashkil etilgan intermodal logistika markazini rivojlantirish maqsadida Korean Air kompaniyasi bilan yaqin hamkorlik amalga oshirilmoqda.
- Hammaga maʼlumki, Oʻzbekistonda koʻp sonli koreys diasporasi istiqomat qiladi. Mamlakatlarimiz xalqlari oʻrtasidagi doʻstlik va bir-birini oʻzaro toʻgʻri tushunishni mustahkamlash uchun Toshkentda Koreya madaniyati va sanʼati uyiga poydevor qoʻyilishi marosimida ishtirok etasiz. Marhamat qilib ushbu loyiha yuzasidan oʻz fikr-mulohazalaringizni oʻrtoqlashsangiz.
— Markaziy Osiyo mamlakatlari orasida Oʻzbekistonda eng koʻp koreys diasporasi yashaydi. Ularning soni qariyb 180 ming kishini tashkil etadi.
Tashrif davomida bizning delegatsiyamiz Oʻzbekistondagi koreyslarning oʻziga xosligi, anʼana va urf-odatlarini asrash, mamlakatlarimiz oʻrtasidagi doʻstlik va hamkorlikni mustahkamlash maqsadida tashkil etilayotgan Koreya madaniyati va sanʼati uyi qurilishining boshlanishi marosimida qatnashamiz. Koreya Respublikasi Prezidenti Pak Kin Xening 2014-yil iyun oyida Toshkentga buyurgan davlat tashrifi chogʻida Oʻzbekiston Prezidenti Islom Karimov bu muassasani barpo etish tashabbusini ilgari surgan edi. Mazkur loyiha ikki davlat rahbarlarining oʻzbek zaminida yashaydigan koreys diasporasiga nisbatan alohida eʼtibori va gʻamxoʻrligining ifodasi hisoblanadi.

Migrant hujjatlari. - Sputnik Oʻzbekiston
Jamiyat
Oʻzbek migrantlari endi Janubiy Koreya va BAAga yoʻl olishmoqda
Koreya madaniyati va sanʼati uyi qurilishini 2017-yili tugallash rejalashtirilmoqda. Bu yerda kontsert, koʻrgazma zallari, mehmonxona va boshqa infratuzilmalar yaratiladi. Umid qilamanki, bu muassasa doʻstona almashuvlar maydonchasi boʻlib qoladi. U yerda odamlar taʼlim, pazandalikka oid turli kurslar va koʻrgazmalar tashkil etilishi vositasida Koreya goʻzalligi va tarovatidan bahramand boʻlishadi.
Hukumatimiz Oʻzbekistondagi millatlararo hamjihatlik muhitini yuqori baholagani barobarida koreys diasporasi haqidagi iliq gʻamxoʻrlikni minnatdorlik bilan eʼtirof etadi.
- Bosh vazir janoblari, Siz Oʻzbekiston mustaqilligining 25 yilligi arafasida mamlakatimizga tashrif buyurmoqdasiz. Ushbu qutlugʻ sana munosabati bilan xalqimizga qanday tilaklarni izhor etishni istar edingiz?
— Oʻzbek xalqini yaqinlashib kelayotgan Mustaqillikning 25 yillik bayrami bilan chin dilimdan qutlayman va ushbu tashrifim ana shu yubiley yilida amalga oshayotgani yanada chuqurroq maʼno kasb etishi men uchun quvonarlidir.

Oʻtgan davr mobaynida Prezident Islom Karimov rahbarligida Markaziy Osiyoning eng muhim davlati boʻlib qolgan Oʻzbekiston yillik iqtisodiy oʻsishning 8 foizlik darajasini va iqtisodiyotni modernizatsiyalash boʻyicha dasturlarning hayotga tadbiq etilishini taʼminlamoqda. Mamlakatning jahon maydonidagi maqomi ogʻishmay yuksalib bormoqda. Oʻzbekiston joriy yilda bir yoʻla ikki yirik tizimga — Shanxay hamkorlik tashkiloti va Islom hamkorlik tashkilotiga raislik qilayotgani bu fikrni tasdiqlaydigan dalillardan biridir.

Mamlakatingizda jadal taraqqiyotning kuzatilayotgani sodiq doʻst boʻlgan, qoʻlni-qoʻlga bergani holda birgalikda muvaffaqiyatlarga erishayotgan Janubiy Koreyani quvontiradi. Ishonchim komilki, biz bundan keyin ham yaqin hamkorlar boʻlib qolaveramiz.

Oʻzbek xalqiga salomatlik va baxt-iqbol, mamlakatlarimizga esa mustahkam doʻstlik va farovonlik tilayman.

Yangiliklar lentasi
0
Avval yangilariAvval eskilari
loader
LIVE
Zagolovok otkrыvayemogo materiala