Usturt gaz-kimyo majmuasi foydalanishga topshirildi

TOShKENT, 23-may — Sputnik. Surg‘il(Qoraqalpog‘iston)da Usturt gaz-kimyo majmuasi qurilishi yakunlanishi va uning ishga tushirilishiga bag‘ishlangan marosim bo‘lib o‘tdi, deb xabar qilmoqda "Jahon" AA.

Tadbirda O‘zbekiston Respublikasi Bosh vaziri Shavkat Mirziyoyev va Janubiy Koreya Respublikasi Bosh vaziri Xvan Gyo An so‘zga chiqishdi. O‘zbekiston va Janubiy Koreya hukumatlari rahbarlari gaz-kimyo majmuasining muvaffaqiyatli ishga tushirilishini ikki mamlakat hamkorligida muhim bosqich deb atadi.

"Loyiha o‘zida hamkorlikning yangi modelini taqdim etib, xom ashyo resurslarini eksport qilishdan birgalikda ishlab chiqarish va tashqi bozorga yuqori qo‘shimcha qiymatli mahsulotlarni yetkazib berishni ko‘zda tutadi", — dedi Janubiy Koreya bosh vaziri.

Umumiy qiymati 4 milliard dollarlik ushbu loyihaning amalga oshirilishi yiliga 4,5 milliard kub metr tabiiy gazni qayta ishlash hisobidan 3,7 milliard kub metr gaz, 387 ming tonna polietilen, 83 ming tonna polipropilen, 102 ming tonna piroliz distillyati va boshqa qimmatbaho mahsulotlar ishlab chiqarish imkonini beradi.

Qurilishi 2012-yilda boshlangan Usturt gaz-kimyo majmuasida gazni taqsimlaydigan, etilen, polietilen, polipropilen ishlab chiqaradigan va energiya manbalari bilan ta’minlaydigan jami beshta zavod, shuningdek, zamonaviy infratuzilma obyektlari barpo etilgan. Ular dunyodagi eng zamonaviy yuqori texnologiyalar bilan ta’minlangan, eng so‘nggi rusumdagi uskunalar o‘rnatilgan. Majmuada 1300 ga yaqin mutaxassis faoliyat ko‘rsatmoqda.

Usturt gaz-kimyo majmuasida mahsulot ishlab chiqarish jarayoni sinov tariqasida o‘tgan yili boshlangan edi. 2015-yilda 54,9 ming tonnadan ziyod suyultirilgan uglevodorod gazi, 34 ming tonnadan ortiq gaz kondensati ishlab chiqarildi.

Magistral gaz quvurlariga 1,8 milliard kub metrdan ortiq etan va gaz, "O‘zbekenergo" aksiyadorlik jamiyati energiya tizimiga 87,5 ming megavattdan ziyod elektr energiyasi yetkazib berildi. Ayni paytda piroliz distillyati Buxoro neftni qayta ishlash zavodiga benzin tayyorlash uchun yuborilmoqda.

Polietilen va polipropilen qator xorijiy davlatlarga eksport qilinmoqda. Shu kunga qadar qariyb 150 million dollarlik 186 ming tonnadan ortiq polietilen va polipropilen Markaziy va Sharqiy Osiyo, MDH va Yevropa mamlakatlariga jo‘natildi.

Ma’lumotlarga ko‘ra, 2020-yilga borib polietilen ishlab chiqarish hajmi 4,1 barobar oshadi.