Yaponiya Bosh vaziri: Xirosima voqealari takrorlanishiga yo‘l qo‘ymasligimiz kerak

TOShKENT, 27-may — Sputnik, Kseniya Naka. Xirosima qurbonlarini xotirlash marosimida AQSh prezidenti Barak Obama ham ishtirok etdi, RIA Novosti xabari asosida.

"Bu kabi fojia boshqa bir joyda takrorlanishiga yo‘l qo‘ymasligimiz shart. Bu tuyg‘uni o‘zimizda singdirib — avlodlarga yetkazish burchimiz. Biz atom qurolisiz dunyo g‘oyasini hayotga tatbiq etmog‘imiz lozim. Bu oson kechmaydi, ammo boradigan yo‘limiz qanchalik olis va mashaqqatli bo‘lmasin, taslim bo‘lmasligimiz kerak. Mangu olov oldida dunyoda tinchlik va osoyishtalik hukm surishiga hissa qo‘shishimiz haqida qasamod qilaylik. Yaponiya va Amerika bu majburiyatni kuchlarni birlashtirgan holda amalga oshiradi, biz insonlarga umid uchqunlarini hadya etishimiz kerak", — dedi Sindzo Abe.

Tadbir so‘ngida Amerika prezidenti atom bombasidan zararlanganlar yoniga borib, ular bilan qo‘l berib ko‘rishdi.

Eslatib o‘tamiz, 1945-yilning avgustida amerikalik uchuvchilar tomonidan Yaponiyaning Xirosima va Nagasaki shaharlari ustidan tashlangan atom bombalar Xirosimada — 140 ming, Nagasakida — 74 ming kishining hayotiga zomin bo‘ldi. Xirosima va Nagasakining atom bombasi hujumiga duchor qilinishi insoniyat tarixida yadroviy qurol tinch aholiga qarshi ishlatilganining yagona misolidir.
Shu paytga qadar Amerikaning birorta prezidenti Yaponiyaning Xirosima va Nagasaki shaharlariga tashrif uyushtirmagan.