Putinning Poroshenkoga javobi: ilohim, sizning buzogʻingiz bizning boʻrini yeb qoʻysin

TOSHKENT, 28 may — Sputnik. Qrim masalasi yopilgan, unga boshqa qaytmaymiz, dedi Vladimir Putin Ukraina yetakchisi Petr Poroshenkoning "Nadejda Savchenko ortidan Qrim yarimorolini ham qaytaramiz", degan taʼkidiga javoban. RIA Novosti xabari asosida.

"Qrim yarimoroli masalasiga kelsak, bu mavzu allaqachon koʻrib chiqilgan va biz unga boshqa qaytmaymiz. U Qrimda istiqomat qilayotgan odamlarning tarixiy qarori, va bu borada Rossiya hech kim bilan muzokara olib bormaydi", — deb taʼkidladi Vladimir Putin.

"Shu oʻrinda "sizning buzogʻingiz bizning boʻrini yeb qoʻysin" degan bir mashhur matalni keltirib oʻtishni joiz deb bildim", — deya qoʻshimcha qildi Vladimir Putin Poroshenkoning soʻzlari "ushalmas orzudan boʻlak hech vaqo emasligiga" iddao qilgan holda.

"Shunday ekan, kelinglar, yaxshisi bu mavzuga qaytmaymiz", — dedi oʻz nutqi soʻngida Rossiya prezidenti.

Bundan sal oldin Ukraina prezidenti Petr Poroshenko Savchenko ortidan Donbass va Qrim ham qaytarilishi haqida bayonot qilgan edi.

Eslatib oʻtamiz, rossiyalik jurnalistlar oʻlimida ayblanib, Rossiyada 22 yillik qamoq jazosiga hukm qilingan Nadejda Savchenko marhumlarning yaqinlari iltimosiga binoan, Vladimir Putin tomonidan avf etildi, va 25 may kuni Ukrainaga qaytarildi.

Qrim yarimoroli va Sevastopolda referendum Ukrainada yuz bergan davlat toʻntarishidan soʻng, 2014 yilning fevralida oʻtkazilgan edi. 2014 yil 16 mart kuni boʻlib oʻtgan referendumda yarimorolning aksariyat aholisi Rossiya tarkibiga kirish uchun ovoz berdi. Rossiya va Qrim qoʻshilishi uchun 96,77% qrimliklar va 95,6% sevastopol aholisi ovoz bergan edi. Ukraina hanuzga qadar Qrim yarimoroli vaqtincha okkupatsiya qilingan oʻziga qarashli hudud, deb hisoblab keladi. Shuningdek, qrim yarimoroli xohishi Gʻarb mamlakatlari tomonidan ham tan olinmadi, ular oʻz noroziligini Rossiyaga va Qrim regioniga sanktsiyalar kiritish orqali namoyish qildilar.