TOShKENT, 23-iyun — Sputnik. Toshkentda, ShHT sammiti doirasida O‘zbekiston Respublikasi Prezidenti Islom Karimov Tojikiston Respublikasi Prezidenti Emomali Rahmon bilan uchrashuv o‘tkazdi, deb xabar qilmoqda Tojikiston prezidenti matbuot-xizmati.
Uchrashuvda mamlakatlarimizda hali foydalanilmagan imkoniyatlar ko‘pligi, ularni ishga solish ikki tomon uchun ham manfaatli ekani ta’kidlandi. Savdo-iqtisodiy, madaniy-gumanitar va boshqa sohalardagi aloqalarni yanada mustahkamlash masalalari ko‘rib chiqildi.
Emomali Rahmon Tojikiston O‘zbekiston bilan hamkorlikni yuksak qadrlashini, ushbu uchrashuv o‘zaro hamkorlikning bugungi holati va istiqbollarini muhokama qilish uchun yaxshi imkoniyat bo‘lganini ta’kidladi. Mazmunli uchrashuv uchun Prezidentimizga samimiy minnatdorlik bildirdi.
