Misr OAV: O‘zbekiston va Xitoy strategik sheriklikni mustahkamlamoqda

TOShKENT, 6-iyul — Sputnik. Qohira universiteti huzuridagi Osiyo tadqiqotlari markazi direktori Ala Faruk qalamiga mansub ushbu maqolada Islom Karimov va Si Szinpinning tor doiradagi suhbatida ikki mamlakat o‘rtasidagi hamkorlikning bugungi holati va uni yanada rivojlantirish istiqbollari muhokama etilgani barobarida tomonlarni qiziqtirgan mintaqaviy va xalqaro masalalar yuzasidan ham o‘zaro fikr almashilgan, deb xabar qiladi "Jahon” AA.

Agentlik xabariga ko‘ra, maqolada Xitoy Xalq Respublikasi Raisining ushbu davlat tashrifini izchil rivojlanib borayotgan O‘zbekiston — Xitoy hamkorligi tarixida muhim bosqich, tomonlarning o‘zaro munosabatlarni yanada mustahkamlashga qat’iy intilishi ifodasi ekanligi alohida qayd etilgan.

Gazeta Prezident Islom Karimovning “O‘zbekiston Xitoy bilan strategik sheriklik va o‘zaro manfaatdorlikka asoslangan hamkorlikni yuksak baholaydi va qadrlaydi”, deb aytgan so‘zlarini o‘z o‘quvchilarining e’tiboriga havola qilgan.

Nashr XXR Raisining O‘zbekistonga navbatdagi tashrifidan mamnun ekanini, o‘zaro hamkorlik barcha sohalarda izchil rivojlanib borayotganini alohida ta’kidlagani, shuningdek, uning O‘zbekistondagi boy tarix va madaniyatga katta hurmat bilan qarashini tashrif chog’i ma’lum qilganini ham qalamga olgan.

Shu bilan birga, maqola muallifi bugungi kunda O‘zbekiston va Xitoy munosabatlari strategik sheriklik darajasiga ko‘tarilgani haqida to‘xtalar ekan, ikki mamlakat o‘rtasidagi hamkorlik siyosat, iqtisodiyot, savdo, sanoat, qurilish, ilm-fan, ta’lim, madaniyat kabi barcha sohalarni qamrab olganini ta’kidlaydi. “Bu aloqalar Strategik sheriklik o‘rnatish to‘g’risidagi qo‘shma deklaratsiya, Do‘stlik va hamkorlik to‘g’risidagi shartnoma, Ikki tomonlama strategik hamkorlikni yanada chuqurlashtirish va rivojlantirish haqidagi qo‘shma deklaratsiya kabi qator hujjatlar asosida izchil taraqqiy etmoqda”, deb yozadi u.

Maqolada ikki davlatning xalqaro va mintaqaviy ahamiyatga molik masalalar bo‘yicha pozitsiya va yondoshuvlari o‘xshash yoki yaqin ekanligi, bu esa o‘zaro va ko‘p tomonlama aloqalarida muhim o‘rin tutayotganiga ham alohida urg’u berilgan.