Turkiya AQShdan Gulenni hibsga olish va ekstraditsiya qilishni talab qildi

TOShKENT, 19-iyul — Sputnik. Anqara davlat to‘ntarishiga urinish tashkilotchiligida ayblanayotgan Fatxulla Gulenni topshirishini so‘rab, AQShga rasmiy so‘rov yubordi, deb ta’kidladi Turkiya Adliya vaziri Bakir Bo‘zdog‘. Bu haqda RIA Novosti xabar tarqatgan.

"Turkiyada davlat to‘ntarishini amalga oshirish g‘oyasi muallifi Fatxulla Gulenga nisbatan srishtiruv ishlari davom etmoqda. Bu katta ish, uni bir necha kunda yakunlashning iloji yo‘q. Prezident, Bosh vazir ma’muriyati, TIV darajasida AQShdan Gulenni hibsga olish va bizga topshirish haqida so‘rov yubordik", — degan Bo‘zdog‘.

Vazirning so‘zlariga qaraganda, Gulenning davlat to‘ntarishini amalga oshirmoqchi bo‘lganligini isbotlovchi va uning nazoratida bo‘lgan Turkiyadagi "parallel davlat" faoliyati borasida dalillar "keragidan ham ortiq".

Eslatib o‘tamiz, 15-iyuldan 16-iyulga o‘tar kechasi Turkiyada harbiylar davlat to‘ntarishini amalga oshirishga uringan. Ular vertolot va tanklar yordamida aeroport, ko‘prik, OAV binolari va prezident saroyiga hujumlar uyushtirgan. Turkiya TIV ma’lumotiga ko‘ra, davlat to‘ntarishiga urinish harakatlari oqibatida 290 kishi qurbon bo‘lgan.