TOShKENT, 30-iyul —Sputnik. 2016-yil 3-avgust kuni Vashingtonda AQSh Davlat kotibi Jon Kerri va Markaziy Osiyoning 5 nafar TIV rahbarlari ishtirokida "S5 + 1" formatida uchrashuv o‘tkaziladi. AQSh Davlat kotibining Markaziy Osiyo davlatlari bo‘yicha yordamchisi o‘rinbosari Deniyel Rozenblyum ushbu uchrashuvga bag‘ishlangan telefon-brifing chog‘ida OAV xodimlari, shu jumladan, O‘zbekistonlik jurnalistlar savollariga javob berdi, deb xabar qilmoqda review.uz nashri.
"Xabaringiz bor-ki, "S5 + 1" formati — bu diplomatik muzokaralar formatidir, ammo biz, uning taraqqiy topishini xohlaymiz. U shunday maqomga ega bo‘lmog‘i kerakki, toki biz bu format doirasida mamlakatlarimiz oldida turgan barcha chaqiriqlar borasida muzokara o‘tkaza olaylik. O‘ylaymizki, kelayotgan haftada chorshanba kuni Vashingtonda o‘tkaziladigan uchrashuv ushbu yo‘nalishda qo‘yilgan muhim odimlardan biri bo‘ladi", — deya ta’kidlagan D. Rozenblyum.
Diplomatning so‘zlariga qaraganda, Samarqandda bo‘lib o‘tgan uchrashuv chog‘ida vazirlarning barchasi "S5 + 1" formati manfaatdor mamlakatlar oldida turgan eng keng masala va muammolar uchun forumga aylanishi mumkin, deya ishonch bildirishgan.
Rozenblyumning ta’kidiga qaraganda, Samarqandda bo‘lib o‘tgan birinchi uchrashuvdan so‘ng yuqorida sanab o‘tilgan uch yo‘nalish bo‘yicha ishchi guruhlar tuzilgan. Bu guruhlar tomonidan ishlab chiqilgan tegishli loyihalar Vashingtonda o‘tkaziladigan uchrashuvda muhokama qilinadi.
"Bizning rejaga muvofiq, kelayotgan chorshanbada hamkorlikda tayyorlangan beshta loyiha taqdim etiladi. Agar ular vazirlar tomonidan ma’qullansa, loyihalar haqida to‘liq ma’lumotlar ommaga e’lon qilinadi", — deb xabar qilgan Markaziy Osiyo davlatlari bo‘yicha AQSh Davlat kotibi yordamchisi o‘rinbosari.
Bo‘lib o‘tgan brifing davomida Deniyel Rozenblyum, fursatdan foydalanib, Markaziy Osiyoning besh davlatini yaqinlashib kelayotgan Mustaqillik ayyomining qutlug‘ 25-yilligi sanasi bilan muborakbod etgan.
