Dunyoda

Almazbek Atambayev: bizga yordam berganlar endi yugurdaklik qilishimizni xohlayapti

© Sputnik / Mixail Klimentyev / Mediabankka oʻtishQirgʻiziston Respublikasi prezidenti Almazbek Atambayev
Qirgʻiziston Respublikasi prezidenti Almazbek Atambayev - Sputnik Oʻzbekiston
Obuna boʻlish
NovostiTelegram
Qirgʻiziston Respublikasi prezidenti Almazbek Atambayev 2 avgust kuni matbuot-anjumanini oʻtkazdi. Atambayev bilan uchrashuvga 46 nafar jurnalist va 6 nafar ekspertlar akkreditatsiyadan oʻtgan.

TOSHKENT, 2 avg — Sputnik. Taʼkidlash joizki, matbuot-anjumanda ishtirok etish uchun jurnalistlar Issiq-Koʻlga shanba kunidayoq kelishgan. Ikki kun davomida OAV xodimlari Choʻlpon-Otadagi davlat qarorgohi hududida dam oldilar, deb yozadi Sputnik Qirgʻiziston nashri.

Qirgʻiziston Prezidenti oʻz nutqini tadbirga kechikib kelgani uchun uzr soʻrashdan boshlagan. Quyida mantuot-anjumanida Atambayev soʻzlagan nutqdan iqtiboslarni keltirib oʻtamiz.

Konstitutsiyaga kiritilayotgan oʻzgartirishlar haqida

"Agar men hokimiyatni saqlab qolishni istaganimda, men boshqacha referendum oʻtkazgan boʻlar edim. Bugungi kunda koʻplab regionlardan "Atambayev prezidentlikni davom ettirsin" mazmunidagi maktublar kelmoqda. Referendum oʻtkazish uchun hech qanday muammoga duch kelmaganman. Konstitutsiyaga oʻzgartirishlar kiritishdan maqsad, toki hech kim biz chiqqan davrlarga Qirgʻizistonni qaytara olmasin. Xavf-xatarlar boʻlmasligi uchun Asosiy qonunimizdan "mina"larni olib tashlamoqdamiz"

"Voris" operatsiyasi

Demokratik davlatni barpo qilmoqchi ekanmiz, boʻlajak prezident xalq tomonidan odil sudlov yoʻli bilan saylanmogʻi lozim. Barcha munosib nomzodlar saylovlarda ishtirok etish huquqiga ega boʻladi. Balki ishonchga sazovor boʻla olmagan nomzodlar ham boʻlar, ammo men kimnidir ochiq agitatsiya qilishim yoki yordam berishim singari holatlar umuman boʻlmaydi".

"Gyulen izdoshlari" va Chavushoglu bayonoti haqida

"Bu — bemaʼnilik. Agar shunchalik aqlli ekan, unda nega davlat toʻntarishi sodir etilganda, gʻaflatda qolishdi? Albatta, biz barcha maslahatlarni tinglaymiz va maʼlumotlarni tekshirib koʻramiz. Lekin bizga tahdid qilishning va aql oʻrgatishning keragi yoʻq. Biz qoʻrqib boʻlganmiz.

"Sebat" haqida maʼlumotlarni tekshirib chiqamiz. Ammo ular bizning standartlar boʻyicha ishlashayapti va sifatli ilm dargohlari bizga kerak".

Turkiya bilan munosabatlar toʻgʻrisida

Biz suveren davlatmiz. Bizga nima kerak nima kerakmasligini oʻzimiz hal qilamiz. Mamlakatlar bir-birlariga xolis yordam bermogʻi lozim, yordam berib qoʻyib, endi bular bizga yugurdaklik qiladi, deb oʻylashlari kerakmas. Bunday yordamning bizga keragi yoʻq, qaytarib olishingiz mumkin. Biz barcha davlatlarga koʻrsatgan koʻmaklari uchun minnatdormiz, faqat bizga shart qoʻyish kerakmas".

Terrorchilik, libos va bannerlar haqida

"Men milliy liboslardagi qizlar tasviri tushirilgan bannerlarni butun respublika boʻylab osib chiqish fikrini qoʻllab-quvvatlagan edim. Ammo baʼzi bir aqllilar biz mini-yubkalarga qarab ketayotganimiz haqida plakatlarni ilib chiqibdi.

Bizning ayollarimiz sobiq Ittifoq davridayoq mini-yubkalarda yurishgan. Din mohiyati — ezgulik. Xohlang, boshingizga etik kiyib yuring, faqat hech kimni portlatmang.

Agar sizga biror kiyim yoqmasa, bu fikrni boshqalarga zoʻrakilab oʻtkazishga urinmang, boshqa mamlakatga koʻchib ketib yashang. Suriya yoki Bangladeshgacha yoʻl haqingizni toʻlab qoʻyamiz"

Konferentsiya davomida prezident yoqasini toʻgʻrilab qoʻygan operatorga qarab Atambayev: "Operatormi desam, imijmeyker ham ekan", — dedi.

Din va hokimiyat haqida

"Hokimiyat tepasiga din vakili kelgan birorta davlat rivojlanmagan. Bundaylarni darhol "joyiga oʻtqazish" lozim. Ana shundaylardan biri "Qirgʻiziston" partiyasini qoʻllab-quvvatlab hokimiyatdan oʻrin egallamoqchi boʻluvdi. Men unga agar siyosatga aralashmoqchi boʻlsang, soqolingni qirtishlab, aralashaver, deb aytdim. Bundaylarning aksariyati oʻz vaqtida qamoqqa oʻtirishi mumkin edi. Bizga baʼzi bir arab davlatlaridagi singari holatning keragi yoʻq".

Chegaralardagi muammolar haqida

"Chegara muammosi yaqin oʻrtada hal boʻlmaydi. Barcha muammolarning yechimini bir tomonlama tartibda hal etishning imkoni yoʻq. Qirgʻiziston bunday buyogʻiga boshqa davlatlar rahbarlari oldida tiz choʻkmaydi. Faqat bir narsani aniq aytishim mumkin: keyingi prezidentga oson boʻladi. Ammo, prezidentlik vakolatim tugaguncha, barcha muammolarning yechimini topolmasligimni yana bir bor aytib oʻtmoqchiman".

Kimni tanlaydi: Trampnimi yoki Klintonni?

"Milliy xavfsizligimiz uchun aniq birini aytib oʻtmayman. Agar aytganim notoʻgʻri chiqib, boshqasi hukumat tepasiga kelsa, unda u bilan qanday ishlaymiz? (kuladi)"

"Savollaringiz tugadimi, aniqmi? Xudoga shukr", — deb yuzda tabassum bilan anjumanni yakunladi Atambayev.

Qirgʻiziston prezidenti ishtirokidagi matbuot-anjumani 2 soatu 51 daqiqa davom etdi.

Yangiliklar lentasi
0