Erdo‘g‘on Gulenni plagiatchi, uning tarafdorlarini esa lo‘ttibozlar deb atadi

TOShKENT, 4 avg — Sputnik. Turkiya prezidenti Toyib Erdo‘g‘onning fikricha, Fatxulla Gulen turk xalqini bayroqsiz, vatansiz, millatsiz va davlatsiz qoldirish maqsadida isonni amalga oshirmoqchi bo‘lgan. RIA Novosti xabari asosida.

"Aytishlaricha u (Gulen) kitoblar, allaqanday asarlar yozarmish… Bu "ijod" mahsulotlarida plagiat tiqilib yotibdi. Bir vaqtlar Turkiya Diniy ishlar boshqarmasiga bu asarlarni Diniy ishlar bo‘yicha Oliy yig‘inga topshirib, chuqur tahlil qilib chiqilishi lozimligini aytgan edim. Kitoblar mazmun jihatdan ko‘pdan ko‘p joylari bizning muqaddas dinimizga mos emas. Diniy ishlar bo‘yicha Oliy yig‘in "FETÖ" (Gulen boshqaruvidagi terrorchilik tashkiloti) gunohlari galereyasi nomli kitob chop etib, unda Gulenning kirdikorlarini fosh qilsa ayni muddao bo‘lur edi", — deb ta’kidlagan Erdo‘g‘on Anqaradagi prezident saroyida chiqish qilib. Erdo‘g‘on nutqidan Anadolu agentligi iqtibos keltirgan.

Turk rahbari so‘zlariga muvofiq "o‘tmishda yaxshi lavozimlarni egallagan, ko‘rinishidan tuppa-tuzuk odamlar uyatni yig‘ishtirib qo‘yib, "U bizga uyqu arteriyasidan ham yaqinroq", deya gap boshlashadi. "Ular kim haqda gapirapti? Pensilvaniyada o‘tirgan nusxa (ya’ni, Gulen demoqchi, tahr.) haqidami? Voy, sharlatanlar-yey! Faqat Allog‘gina bizga uyqu arteriyasidan ham yaqinroq bo‘lishi mumkin va boshqa hech kim va hech narsa emas. Boshqacha fikr bildirish — shakkoklik qilish demakdir. Nega? Chunki siz ayni vaqtda Pensilvaniyada yashab kelayotgan nusxani ilohiylashtirishga harakat qilyapsiz", — deya ta’kidlagan Erdo‘g‘on.

"Turkiya xalqi uning o‘zga vatani yo‘qligini va bo‘lishi ham mumkin emasligini yaxshigina tushuntirib qo‘ydi bu buzuqlarga. Qolaversa bu sharlatanlarga hech kim davlatni berib qo‘ymasligini ham yaxshi tushuntirishdi…

Bu tuzilmaning har bir maktabi, har bir o‘quv dargohi, to‘garaklari va jamg‘armalari — terrorning alohida uyasidir. Bu kabi kimsalarga nisbatan "lekin" va "ammo" kabi so‘zlarni qo‘llayotganlar esa, mening nazdimda, ular bilan birgalikda harakat qilmoqda. Gulen boshchiligidagi jinoiy jamg‘arma hisobiga tushirilgan har bir tiyin — xalqqa qarata to‘g‘rilangan navbatdagi o‘qdir. Xalqqa qarata o‘q uzadiganlarni kechirmaganimiz kabi, isonchilarni moliyaviy jihatdan ta’minlaydiganlarni ham avf etmaymiz", — dedi Turkiya rahbari.

Turkiya prezidenti so‘zlariga ko‘ra, Gulen tashkiloti a’zolari o‘z strukturalari tashkil qilingan 160 davlatning barchasini "vatanmiz" deb ataydilar va hatto shu holatgacha yetib borishganki, bu davlatlarni o‘z qo‘llariga olishga tayyorgar ekanliklarini ma’lum qilishgan.

"Ular AQShni ham qo‘lga olishmoqchi ekanliklarini ma’lum qilganlar, va o‘z faoliyatlarini aynan shu davlatdan turib boshqarib turganliklari haqida sha’ma qilib kelmoqdalar", — deya qo‘shimcha qilgan Erdo‘g‘on.