Germaniyaga kirib borayotgan 80% qochqinlar shaxsni tasdiqlovchi hujjatga ega emas

TOShKENT, 11 avg — Sputnik. Bild nashri payshanba kuni e’lon qilgan xabarga ko‘ra, Germaniyaga kirib kelgan qochqinlarning 80% shaxsni tasdiqlovchi hujjatga ega emas. RIA Novosti xabari asosida.

Nashrga ko‘ra, qochqinlar o‘z hujjatlarini atay yashirib, migratsiya xizmatida esa ularni yo‘qotib qo‘yganliklari haqida ma’lum qilishmoqda. Qochoqlarning kattagina qismi esa o‘zlarini Suriya fuqarosi sifatida ko‘rsatmoqda, negaki shu tariqa Germaniyada yashash huquqini qo‘lga kiritish imkoniyati yuqori.2015 yilda Suriyadan kirib kelgan qochoqlarning 96% Germaniyada qabul qilingan edi.

Bundan tashqari, ko‘plab boshpana izlovchilar o‘z yoshini atay kichraytirib aytmoqda — negaki, migratsiya xizmati shaxsni "balog‘at yoshiga yetmagan, kuzatuvchisiz kelgan", deb topgan taqdirda qochqinga ijtimoiy sug‘urta jamg‘armasidan oyiga 80dan to 180 yevro miqdorida to‘lov to‘lab borilishi lozim, deb xabar qilmoqda Bild.

2015 yilda Germaniya bir milliondan ortiq qochqinlarni qabul qildi. Suriya va Afg‘onistondan kirib kelgan qochqinlar tomonidan Bavariyada iyul oyida amalga oshirilgan qator teraktlardan so‘ng, Germaniya IIV mamlakat xavfsizligini oshirish chora-tadbirlari majmuini ishlab chiqdi. Yangi tashabbus taqdimoti payshanba kuni Berlinda bo‘lib o‘tadi.