TOShKENT, 19 avg — Sputnik. Ola-Buqa tumanida Qirg‘iziston chegarasidan noqonuniy o‘tgan o‘zbek militsioneri qo‘lga olindi. Bu ma’lumotni Qirg‘iziston bosh vazirining o‘rinbosari Jenishbek Razaqov Sputnik Kirgizstan muxbiri bilan suhbatda tasdiqladi.
O‘zbekiston ommaviy axborot vositalari ilgariroq o‘z manbalariga tayangan holda 13-avgust kuni Qirg‘izistonning “Chayon” maxsus xizmati harbiylari qirg‘iz-o‘zbek chegarasidagi “Damba-5” postiga kelishgani, o‘zbek militsionerlariga “bu hudud Qirg‘izistonga tegishli ekanini aytishgani va suv omboriga kirishga urinishgani” haqida yozishgandi. Rad javobini olgan “Chayon” harbiysi o‘zbek militsionerlarini qo‘rqitish va ularni qochishga majbur qilish uchun avtomatidan yerga o‘q uzgan, deb ta’kidladi Namangan viloyati IIBdagi manba.
O‘zbekiston tomoni bir nafar militsioner ushlanib Qirg‘iziston hududiga olib o‘tib ketilgani haqida bayonot berdi. Qirg‘iziston qurolli kuchlari bosh shtabi bu ma’lumotlar inkor qildi va “uydirma” deb atadi. Keyinroq qator qirg‘iz OAVlarida o‘zbek militsionerlari Qirg‘iziston hududiga noqonuniy ravishda o‘tishgani haqida ma’lumot paydo bo‘ldi.
