TOShKENT, 31 avg – Sputnik. O‘zbekiston va Qirg‘iziston mutaxassislari chegaraning ayrim uchastkalarini ko‘zdan kechirishdi, deb xabar beradi O‘zbekiston TIV matbuot xizmati.
“2016 yilning 24-29 avgust kunlari O‘zbekiston Respublikasi va Qirg‘iziston Respublikasi O‘zbekiston-Qirg‘iziston Davlat chegarasini delimitatsiya va demarkatsiya qilish masalalari bo‘yicha Hukumat delegatsiyalarining ishchi guruhlari O‘zbekiston- Qirg‘iziston Davlat chegarasining ayrim uchastkalarida qo‘shma dala tekshiruvlarini o‘tkazishdi”, — deyiladi xabarda.
Vazirlikning bildirishicha, uchrashuv va muzokaralar yakunlariga ko‘ra qo‘shma protokol imzolangan.
Xabarga ko‘ra, “O‘zbekiston-Qirg‘iziston Davlat chegarasining o‘tish chizig‘i borasidagi mavjud masalalarga tomonlar uchun maqbul yechim topish maqsadida dala tekshiruvlarini davom ettirishga kelishib olindi”.
SSSR tarqalganidan keyin o‘zbek-qirg‘iz davlat chegarasining deyarli chorak qismi delimitatsiya bo‘lmagan, bu esa chegarada doimiy nizolar kelib chiqishiga sabab bo‘lmoqda.
