TOShKENT, 6 sen — Sputnik. Rossiya prezidenti Vladimir Putin O‘zbekistonning birinchi prezidenti Islom Karimov qabriga gul qo‘ydi.
Putin O‘zbekiston Bosh vaziri bilan birgalikda Islom Karimovni xotirladi. Karimovning qabri oldida tiz cho‘kkan holda Putin qizil atirgullarni qabr ustiga qo‘ydi.
Karimovning qabri uzra gulchambar qo‘ygan Vladimir Putin marhumning bevasi — Tatyana Karimova va uning kenja qizi Lola Karimova-Tillayevaga chuqur hamdardlik bildirdi. Rossiya prezidenti va Islom Karimovning qarindoshlari o‘rtasidagi suhbat matbuot vakillari ishtirokisiz kechdi.
O‘zbekiston hukumati va parlamenti juma kuni kechqurun mamlakatning birinchi prezidenti Islom Karimov vafot etgani haqida xabar qilgan edi. 3-sentabrdan boshlab O‘zbekistonda 3 kunlik motam e’lon qilindi. Islom Karimov shanba kuni, o‘z vasiyatiga ko‘ra, Samarqanddagi Shohi-Zinda qabristonida musulmon urf-odatlariga ko‘ra dafn etildi.
Islom Karimovning vafotidan keyin mamlakat konstitutsiyasiga muvofiq, O‘zbekiston prezidenti vazifasini bajaruvchi etib O‘zbekiston Respublikasi parlamentining yuqori palatasi (Senat) Raisi Nigmatulla Yo‘ldoshev tayinlandi.
Shu bilan birga, O‘zbekiston Vazirlar Mahkamasi Karimovning dafn marosimini tashkillashtirish bo‘yicha komissiyaga O‘zbekiston Bosh vaziri Shavkat Mirziyoyev rahbarlik qilishini aytib o‘tgan edi.
Rossiya yetakchisi yordamchisi Yuriy Ushakov "Rossiya prezidenti hamdardlik va ta’ziya bildirish uchun Samarqandga safar qilganini" aytib o‘tdi.
