TOShKENT, 14 sen — Sputnik. Tashqi ishlar vazirligining saytida O‘zbekiston Prezidenti vazifasini bajaruvchi Shavkat Mirziyoyevning Qarori bilan Ilhomjon Ne’matov TIVning alohida topshiriqlar bo‘yicha elchisi etib tayinlanganligi ma’lum qilindi.
"2016 yilning 14-sentabr kuni Tashqi ishlar vaziri Abdulaziz Kamilov O‘zbekiston Respublikasining Prezidenti vazifasini bajaruvchi Shavkat Mirziyoyevning Qarori bilan TIVning alohida topshiriqlar bo‘yicha elchisi lavozimiga tayinlangan Ilhomjon Ne’matovni tanishtirdi”, deyiladi TIV saytida chop etilgan xabarda.
Ne’matov TIVning alohida topshiriqlar bo‘yicha elchisi lavozimida 2013-yil avgustdan 2014-yil iyuligacha faoliyat olib borgan, so‘ngra O‘zbekistonning birinchi Prezidenti Islom Karimovning qaroriga binoan nafaqaga chiqayotganligi munosabati bilan lavozimidan ozod etilgandi. Bungacha u O‘zbekistonning AQShdagi elchisi, Rossiyadagi diplomatik missiya rahbari, respublika tashqi ishlar vaziri o‘rinbosari lavozimlarida ishlagan.
