TOShKENT, 1 okt — Sputnik. Shu yilning sentabr oyi o‘rtalarida O‘zbekiston Prezidenti vazifasini bajaruvchi, Bosh vazir Shavkat Mirziyoyev Toshkent shahridagi qurilish-obodonlashtirish ishlari bilan tanishish maqsadida Yunusobod va Mirzo-Ulubek tumanlariga tashrif buyurgan edi.
Shu kunlarda mazkur mavzu ijtimoiy tarmoqlardagi o‘zbekistonliklar tomonidan qizg‘in muhokamalarga sabab bo‘lmoqda. Ularda, Toshkent metrosining yaqin kelajakdagi yo‘nalishlari hamda Sirg‘ali tumaniga boruvchi yerusti metro bekatlarining ko‘rinishiga oid suratlar namoyish etilmoqda.
Xususan, shunday suratlardan birida Toshkent metrosining yangi loyihalashtirilayotgan yo‘nalishlari aks etgan xaritani ko‘rish mumkin.
Unga ko‘ra, kelgusida mavjud metro yo‘nalishlari so‘nggi bekatdan yana kamida 2ta-3ta bekatga uzaytirilishi, Beruniy bekatidan so‘ng uzaytirilgan O‘zbekiston yo‘nalishining oxirgi bekatidan Sirg‘ali tumani tomon yangi yerusti metro tarmog‘i qurilishi rejalashtirilayotganini ko‘rish mumkin. O‘zbekiston yo‘nalishi Do‘stlik bekatidan keyin Qo‘yliq bozorigacha yangi metro yo‘li bilan kengaytirilishi ham belgilangan.
