TOShKENT, 10 okt — Sputnik. Qozog‘iston O‘zbekiston bilan hamkorlikni bundan buyon yanada kuchaytirishga xayrixohlik bilan qaraydi, dedi Qozog‘iston tashqi ishlar vaziri Yerlan Idrisov.
"Qozog‘iston prezidenti Nursulton Nazarboyevning sentabr oyida Samarqandga qilgan tashrifi O‘zbekiston bilan savdo-iqtisodiy va boshqa sohalardagi hamkorlikning yangi ufqini ochdi. Hukumat delegatsiyalarining o‘zaro tashriflari va bo‘lib o‘tgan muzokaralar janubiy qo‘shnimiz bilan iqtisodiy hamkorlikni yanada chuqurlashtirish borasida ijobiy tasavvur bermoqda", — dedi Idrisov parlamentdagi chiqishi chog‘ida.
"Biz O‘zbekiston bilan 2017-2023 yillarga mo‘ljallangan hukumatlararo iqtisodiy hamkorlik strategiyasini ishlab chiqish va imzolash zaruriyatini e’tirof etdik", — dedi vazir.
Bundan tashqari, u "qo‘shma korxonalar yoki neft, neft mahsulotlari, avtomobil, mashinasozlik, elektrotexnika mahsulotlari yetkazib berish bo‘yicha savdo uylari tashkil etish borasida kelishuvlarga erishilganini" ma’lum qildi.
