TOShKENT, 28 okt – Sputnik. 25-oktabr kuni O‘zbekiston Respublikasi Bosh vaziri Shavkat Mirziyoyev raisligida Bosh vazir virtual qabulxonasi faoliyatining 1 oylik yakunlariga bag‘ishlangan majlis bo‘lib o‘tdi. Bu haqda Shavkat Mirziyoyevning Facebookdagi rasmiy sahifasida ma’lum qilinmoqda.
“Majlisda O‘zbekiston Respublikasi Bosh prokurorining murojaatlarni ko‘rib chiqilayotganda sansalorliklarga yo‘l qo‘ygan qator mansabdor shaxslarga nisbatan choralar to‘g‘risidagi axboroti tinglandi. Majlisda berilgan boshqa yana qator topshiriqlar bo‘yicha bayonnomaning o‘rniga tegishli Vazirlar Mahkamasi Qarori qabul qilinadigan bo‘ldi”, — deyiladi xabarda.
Eslatib o‘tamiz, O‘zbekiston Respublikasi Bosh vaziri Shavkat Mirziyovning virtual qabulxonasi shu yilning 24-sentabr kuni ishga tushgandi.
Facebook ijtimoiy tarmog‘idagi qabulxona faoliyati bilan tanishtirib boruvchi sahifada ma’lum qilinishicha, virtual qabulxona faoliyati boshlangandan keyingi birinchi haftada o‘rtacha kundalik murojaatlar soni 1 000 tadan ortgandi, ikkinchi haftada o‘rtacha kundalik murojaatlar soni 2 000 tadan ortdi, uchinchi haftada esa o‘rtacha kundalik murojaatlar soni 3 000 tadan ortdi, to‘rtinchi hafta oxirida kundalik murojaatlar soni 4000 tadan ortdi.
22 oktabr kuni umumiy murojaatlar soni 70 mingdan ortdi.
