TOShKENT, 8 noya — Sputnik. Human Rights Watch tashkiloti Yevropa parlamentini YeI va O‘zbekiston o‘rtasida o‘zaro hamkorlik aloqalari shartnomasi imzolanishiga rozi bo‘lmaslikka chaqirmoqda, deb xabar qilgan Sputnik Tojikiston nashri.
Tashkilot rasmiy saytida e’lon qilingan bayonotga muvofiq, ayni vaqtda to‘qimachilik protokolining qabul qilinishi O‘zbekistonda majburiy mehnatdan foydalanish holatlari davom etayotganiga ko‘z yumish bilan barobardir. "Bu esa YeI tashqi siyosiy tamoyillariga zid", — deyilgan xabarda.
"Biz, sizni O‘zbekistonda majburiy mehnatdan foydalanish holatlariga barham berilgan holdagina Yevropa parlamenti shartnoma imzolash qarorini qayta ko‘rib chiqishga chaqiramiz", — deb qo‘shimcha qilingan xabarda.
Ammo shunday bo‘lsa-da, deb ta’kidlangan bayonotda, Human Rights Watch tashkiloti 2016-yilgi paxta yig‘im-terimi mavsumida katta yoshdagi yuz minglab kishilarning paxta terimiga majburiy safarbar etilishi holatini qayd etgan. Xabarda aytilishicha, hatto, viloyatlarda paxta yig‘imi shart-sharoitlarini nazoratga olmoqchi bo‘lgan ikki nafar chet ellik jurnalist hamda xalqaro kuzatuvchilarga nisbatan hujum amalga oshirilgan.
O‘zbekiston hukumati majburiy mehnatdan foydalanish amaliyoti to‘xtatiladi, deb ishontirganiga qaramay, Human Rights Watch tashkiloti aks dalillarga guvoh bo‘lib turibdi, deb yozilgan saytda e’lon qilingan xabarda.
Bayonotda, shuningdek, O‘zbekistonda bolalar mehnatidan foydalanish holatlari kamaygani ham qayd etilgan. Ammo, shunday bo‘lsa-da, mahalliy mansabdorlar yig‘im-terim mavsumida kvotalarni bajarish ishtiyoqida bolalar majburiy mehnatiga murojaat qilib turishlari qo‘shimcha qilingan.
Eslatib o‘tamiz, joriy yilning sentabr oyi oxirlarida O‘zbekiston Mehnat vazirligi paxta terimida bolalar mehnati hamda majburiy mehnatdan foydalanish mamlakat qonunlariga va Xalqaro Mehnat Tashkiloti konvensiyasiga zid kelishidan ogohlantirgan edi.
Shuningdek, Mehnat vazirligi rasmiy saytida joylashtirilgan plakatda o‘qituvchilar va tibbiyot xodimlari aks ettirilgan. Plakatda har bir shaxs "qo‘shimcha shartlarsiz terimdan bosh tortishga haqli. Huquqlaringiz buzilgan taqdirda ishonch telefonlariga murojaat qiling", degan so‘zlar yozilgan edi.
