Jamiyat

Otamuratov: Hayot yoʻlimni tanlashimda Islom Karimovning taʼsiri kuchli boʻlgan

© Press-slujba partii "Milliy tiklanish""Milliy tiklanish" partiyasidan Prezidentlikka nomzod Sarvar Otamuratov
Milliy tiklanish partiyasidan Prezidentlikka nomzod Sarvar Otamuratov - Sputnik Oʻzbekiston
Obuna boʻlish
NovostiTelegram
Oʻzbekiston Prezidentligiga eng yosh nomzod Sputnik Oʻzbekistonga bergan intervyusida saylovoldi dasturining ustuvor yoʻnalishlari, YEII, zamonaviy kino va rus tiliga nisbatan munosabatlari haqida fikr bildirdi

"Milliy tiklanish" demokratik partiyasidan Oʻzbekiston Prezidentligiga nomzod Sputnik Oʻzbekistonga bergan eksklyuziv intervyusida davlat rahbari etib saylansa Rossiya va boshqa davlatlar bilan munosabatlarni qanday rivojlantirishi, yoshlarni internetning salbiy taʼsiridan qanday himoya qilish hamda nima evaziga mamlakat iqtisodiyoti va milliy valyutasini mustahkamlashi haqida soʻzlab berdi.

– 2015 yilda "Milliy tiklanish" partiyasidan Prezidentlikka Akmal Saidov nomzodi koʻrsatilganligini hisobga oladigan boʻlsak, partiya tarafidan Sizning nomzodingiz koʻrsatilishi qanchalik kutilmagan hol boʻldi?

Sarvar Otamuratov - Sputnik Oʻzbekiston
Jamiyat
Sarvar Otamuratovning saylovoldi dasturi eʼlon qilindi

– Taʼkidlash joizki, 2015 yilgi saylovlardan soʻng mamlakatimizda, xususan partiyamiz tizimida ham oʻzgarish va yangilanishlar yuz berdi. Partiya safiga zamonaviy qarash va gʻoyalarga ega siyosatchilar, faollarning yangi avlodi kirib keldi. Oʻzbekiston Prezidentligiga saylov kampaniyasi eʼlon qilingach, partiyaning hududiy va mahalliy tashkilotlarida saylovlarda partiyaning ishtiroki va Oʻzbekiston Respublikasi Prezidentligiga nomzod koʻrsatish masalasi koʻrib chiqildi. Joylardagi rahbarlar, turli darajadagi deputatlar tomonidan boʻlajak saylovlarda partiya rahbari nomzodini koʻrsatish taklif etildi. Shundan kelib chiqib, partiya Markaziy Kengashi Nizomga muvofiq oʻz Qurultoyida kun tartibiga mazkur masalani kiritdi. 2016 yil 15 oktyabrda boʻlib oʻtgan partiya Qurultoyida mening nomzodim ilgari surildi va tasdiqlandi.

– Sizga qaysi oʻzbek yoki jahon siyosatchisi katta taʼsir koʻrsatgan?

– Mustaqillik yillari davomida Oʻzbekistonda barcha sohalarda muhim islohotlar amalga oshirildi. Iqtisodiyot rivojlandi, diversifikatsiya qilindi, sanoat ishlab chiqarishida muntazam oʻsish kuzatilmoqda, xalq farovonligi oshmoqda. Oʻzbekiston xalqaro hamjamiyatning teng huquqli aʼzosiga va Markaziy Osiyo mintaqasida obroʻga ega yetakchi davlatga aylandi. Mamlakatimiz bularning barchasiga Oʻzbekistonning Birinchi Prezidenti Islom Abdugʻaniyevich Karimovning xizmatlari tufayli erishdi. Shu bois aytishim mumkinki, hayot yoʻlimni tanlashimda u kishining taʼsiri kuchli boʻlgan.

– Partiyangiz dasturida yoshlar siyosati va yoshlarning maʼnaviy tarbiyasiga alohida eʼtibor qaratilgan. Butunjahon internet tarmogʻi va yangi texnologiyalarning oʻzbek yoshlariga salbiy taʼsiri va tahdidi nimalarda deb bilasiz?

– Yoshlar hamma narsaga qiziquvchan va yangi bilim hamda maʼlumotlarni egallashga intiluvchan boʻlishadi, lekin shu bilan bir vaqtda ular turli "jozibador” gʻoya va mafkuralar taʼsiriga oson berilishadi. Bu qator omillar, jumladan, toʻliq shakllanmagan ruhiyat, dunyoqarash, hayotiy tajribaning yetarli emasligi va boshqa omillar bilan bogʻliq. Buni ekstremistik, siyosiy-diniy oqimlarga xizmat qiluvchi shaxslar yaxshi bilishadi va qulay texnologiyalar, xususan, internet orqali yoshlarning ongini "zaharlash”ga va shu bilan ularni turli tashkilotlarga jalb qilib, buzgʻunchilik faoliyatini amalga oshirishga urinadilar. Menimcha, biz, dunyoviy, huquqiy, demokratik davlat tarafdorlari bunga qarshi oʻz informatsion mahsulotlarimizni yaratishimiz, yoshlarni umuminsoniy va milliy qadriyatlarga sadoqat ruhida tarbiyalashimiz lozim. Buning asosi esa oiladagi tarbiya, taʼlim, madaniy maʼrifat va boshqalar hisoblanadi.

– Milliy internet-mahsulotlardan biri – Davra.uz ijtimoiy tarmogʻi Rossiyadagi va boshqa xalqaro tarmoqlarga muqobil maydoncha sifatida mamlakat fuqarolarining oʻzaro muloqot qilishlari uchun yaratilgan. Loyiha bir necha oy ilgari ishga tushdi, biroq hozircha fuqarolar orasida u qadar ommaboplikka erisha olmadi. Sizningcha, buning sababi nimada va auditoriyani bunday servislarga qanday qilib jalb etish mumkin?

Davra.uz ijtimoiy tarmogʻi - Sputnik Oʻzbekiston
Jamiyat
Bosh vazir virtual qabulxonasiga "Davra.uz" ijtimoiy tarmogʻi orqali murojaat etish mumkin

– Bugungi kunda Uz domenida 37ta ijtimoiy tarmoq roʻyxatga olingan. Ularning aksariyati oʻzining doimiy auditoriyasiga ega. Milliy ijtimoiy tarmoqlarni ommalashtirish – buzgʻunchi gʻoya va axborotlarga qarshi kurashishning eng samarali yoʻli. Xorij saytlaridan farqli oʻlaroq, oʻzbek internet-resurslari qator ahamiyatli ustunliklarga ega. Ulardan biri – Oʻzbekiston ijtimoiy tarmoqlari xavfsiz: ularda shaxsini yashirib roʻyxatdan oʻtishning imkoni yoʻq. Bu har bir foydalanuvchining axborot tarqatishdagi masʼuliyatini oshiradi. Masalan, muloqot.uz ijtimoiy tarmogʻi koʻrinishi va bajaradigan vazifalari miqyosi boʻyicha hech qaysi xorij resursidan qolishmaydi. Bundan tashqari, bu yerda foydalanuvchilar nafaqat muloqot qilish yoki ijod bilan shugʻullanishlari, balki atrofdagilarni oʻz faoliyati, tajribasi, bilim va fikrlari bilan tanishtirishlari mumkin.

"Davra.uz”ga keladigan boʻlsak, mazkur ijtimoiy tarmoq yaratilganiga nisbatan koʻp boʻlmadi. Va tan olish lozimki, u xorij saytlari kabi ommabop emas, lekin mazkur resurs ommalashishi uchun vaqt va samarali targʻibot kerak boʻladi. Uning texnik tomondan taraqqiy etishi, raqobatbardoshlik sharoitlarini yaratish esa bugungi kunda mutaxassislar oldida turgan muhim vazifadir.

Bundan tashqari, milliy ijtimoiy tarmoqlarni rivojlantirish uchun jahon tajribasidan samarali foydalanish, ijodiy informatsion muhit yaratish, eng asosiysi, ijodiy jarayonga yosh yigit-qizlarning oʻzlarini jalb etish darkor. Eʼtirof etishimiz lozimki, hozirda eng asosiy axborot yetkazuvchi manbalardan biri ijtimoiy tarmoqlardir. Bundan tashqari, internet-makonda yolgʻon maʼlumotlar juda koʻp. Oʻzbilarmonlik, maʼlum bir muammo haqida jim turish yoki boshqasini koʻpirtirish oʻquvchini chalgʻitadi. Tanganing yana bir tomoni esa – axborotning oʻta koʻpligi va bilimning kamligidir. Bu sohada asosiy muammo targʻibotchilar, kuchli tashkilotchi va maʼnaviyatchilarning yetishmasligidir. Informatsion hamjamiyat kuchlarni birlashtirishi hamda jamiyat va davlat manfaatlariga xizmat qiluvchi fuqarolik jurnalistikasini rivojlantirishi lozim. Bunda milliy mediatuzilmani qoʻllab-quvvatlash va rivojlantirish, raqobatbardosh media mahsulotlari yaratishni unutmaslik darkor. Bizning bugungi kundagi asosiy vazifamiz aynan mana shundan iborat.

– Sizningcha, Oʻzbekistonning Yevrosiyo iqtisodiy ittifoqiga qoʻshilishi qanchalik istiqbolli va ahamiyatli yoki alohida davlatlar bilan ikki tomonlama munosabatlar oʻrnatilgani samaraliroqmi?

– Oʻzbekiston BMT, SHHT, MDH va boshqa xalqaro tashkilotlarning aʼzosi, ularning faoliyatida birinchi navbatda oʻz milliy manfaatlarini olgʻa surgan holda faol ishtirok etadi. Bular qatorida iqtisodiy masalalar muhim oʻrin tutadi. Tajriba savdo-iqtisodiy munosabatlarni rivojlantirishning eng samarali yoʻli bu ikki tomonlama aloqalar ekanligini koʻrsatdi. Oʻzbekiston YEIIga aʼzo barcha davlatlar bilan yaxshi va mustahkam munosabatlar oʻrnatgan. Rossiya Federatsiyasi strategik hamkor va doʻst mamlakat sifatida Oʻzbekistonning eng asosiy savdo-iqtisodiy sheriklaridan biri hisoblanadi. Biz mamlakatlarimiz oʻrtasidagi munosabatlarni bundan buyon ham mustahkamlash va rivojlantirish tarafdorimiz.

– Milliy valyuta kursi masalasi bugungi kunda nafaqat oʻzbekistonliklarni, balki Respublikaning tashqi savdodagi hamkorlarini ham oʻylantirmoqda. Siz "qora bozor”ga qarshi qanday kurashmoqchisiz va oʻzbek soʻmining jahon valyutalariga nisbatan kursini mustahkamlash uchun nima qilish zarur?

Jamiyat
Oʻzbekistonda dollarning "bozor kursi" keskin oshdi

– Oʻzbekiston davlat mustaqilligiga erishganidan soʻng valyuta bozorini taraqqiy ettirish boʻyicha turli fikr va nuqtai nazarlar bildirilgandi. Taʼkidlash joizki, respublika iqtisodiyoti bir tomonlama, rivojlanmagan va mahsulot bozoridagi narxlar oʻzgarishiga bogʻliq edi. Tabiiyki, bunday sharoitda erkin kursning joriy etilishi milliy mahsulot ishlab chiqaruvchilarning, ichki bozorning rivojlanishiga imkon bermas, Oʻzbekistonni toʻlaligicha tashqi omillarga tobe qilib qoʻyishi mumkin edi. Iqtisodiy taraqqiyotning besh tamoyilidan biri islohotlarning bosqichma-bosqich amalga oshirilishidir. Shu sababli valyuta boshqaruvini muntazam yengillashtirib borish boʻyicha choralar qabul qilindi. Bundan tashqari, davlat iqtisodiyotning bosh islohotchisi sifatida investitsiya oqimini, jumladan iqtisodiyotning ustuvor sohalariga xorijiy investitsiya kirib kelishini tartibga soldi. Bu esa Oʻzbekistonning bir paytlardagi agrar respublikadan sanoat mamlakatiga aylanishiga, sanoatning YAIMdagi ulushini 24,5%gacha yetkazishiga imkon berdi. Ishlab chiqarish mahsulotlarining koʻpayishi hisobiga qishloq xoʻjaligining YAIMdagi ulushi 17%gacha qisqardi, bugungi kunda YAIMning teng yarmidan ortiq (54%) ulushini xizmatlar tashkil etadi, tayyor tovar va xizmatlarni eksport qilish hajmi bir necha baravarga oshdi. Iqtisodiyot diversifikatsiyalashtirildi hamda tashqi omil va raqobat taʼsiriga kamroq tushadi.

Bugungi kunda Oʻzbekiston valyuta siyosatini yangi bosqichga koʻtarish uchun barcha imkoniyatlarga ega.

Soʻm kursini mustahkamlash uchun raqobatbardosh tovar va xizmatlar ishlab chiqarishni oshirish, xususan eksport geografiyasini kengaytirish, milliy valyutani bundan buyon ham konvertatsiya qilishni kengaytirishni taʼminlash zarur.

– Oʻzbekiston milliy toʻlov tizimi hamda qator xalqaro servislardan foydalangan holda naqd pulsiz hisob-kitob tizimiga oʻtmoqda. Biroq bankomatlarda pul vositalarini naqdlashtirish va xizmat koʻrsatish borasida koʻplab muammolar mavjud. Bu holatning asosiy sabablari nimada deb bilasiz va buni qanday bartaraf etmoqchisiz?

– Turli subʼyektlar orasidagi oʻzaro hisob-kitoblarda naqd pulsiz hisob shakli ommalashgan. Respublikamizda hisob-kitobning mazkur shakli bosqichma-bosqich joriy etildi va undan bugungi kunda aksariyat yuridik va jismoniy shaxslar foydalanmoqda. Shu bilan birga, mazkur tizim hamma joyda ham bank mijozlari talablariga javob bermayapti, pul vositalarini naqdlashtirish borasida muammolar mavjud. Mazkur masala Qonunchilik palatasida Markaziy bank va boshqa yirik tijorat banklari rahbarlari ishtirokida koʻrib chiqilishi partiya fraktsiyasi tomonidan rejalashtirilmoqda.

– Partiyangiz dasturidagi bandlardan biri Oʻzbekistonda turizm sohasini izchil rivojlantirishga bagʻishlangan. Mamlakatga turistlar oqimini, xususan rossiyalik turistlar oqimini qanday qilib oshirmoqchisiz?

– Jahon tsivilizatsiyasining qadim oʻchoqlaridan biri boʻlgan Oʻzbekiston mintaqada sezilarli turistik salohiyatga ega. 7000dan ortiq tarixiy-arxitektura yodgorliklari, koʻz qorachigʻidek asrab kelinayotgan maʼnaviy meros, qadimiy shaharlar – Samarqand, Buxoro, Xiva, Shahrisabz, YUNESKO Butunjahon merosi roʻyxatiga kiritilgan yodgorliklar har yili mamlakatimizga dunyoning 70 davlatidan ikki millionga yaqin turistni jalb etadi.

London - Sputnik Oʻzbekiston
Turizm
Oʻzbekiston London turizm koʻrgazmasida ishtirok etadi

Bugungi kunda mamlakatimizda 500dan ortiq turistik kompaniyalar xizmat koʻrsatmoqda. 110dan ortiq xalqaro yoʻnalishlar mavjud. Ulardan 65tasi tarixiy-madaniy yodgorliklar, 30tasi tabiat-rekreatsion, 15tasi sogʻlomlashtirish turizmi unsurlari mavjud ekologik yoʻnalishlardir. Ayni paytda Oʻzbekistonga tashrif buyuruvchilar uchun eng ommabop turizm turi madaniy-tarixiy turizm boʻlib qolmoqda.

Bizningcha, yurtimizga turistlar oqimini oshirish uchun keng turistik auditoriyaga ega mamlakatlar uchun qator xarajatlarni kamaytirish yoki qoʻshimcha imtiyozlar berish zarur. Turizm infrastrukturasini yanada rivojlantirish, oʻrtacha sinfdagi qulay mehmonxonalar sonini oshirish, xizmatlar sektorini rivojlantirish, xususan, aeroport va vokzallardagi servis sifatini yaxshilash, sohaga zamonaviy informatsion texnologiyalarni joriy etish muhim ahamiyat kasb etadi.

Shuningdek, uzoq muddatli strategik va hamkorlik munosabatlarini oʻrnatgan davlatlar fuqarolari uchun viza rejimini soddalashtirish, turistlar yoʻlidagi byurokratik toʻsiqlar, rasmiyatchiliklarni bartaraf etish joiz.

Fikrimizcha, turistik faoliyat koʻrsatadigan obʼyektlarda, xalqaro aeroport va vokzallarda turizm biznesini rivojlantiruvchi omil sifatida servis va xizmat koʻrsatish sifatini yaxshilash darkor.

Turistik xizmat koʻrsatishning barcha darajalarida xizmat koʻrsatuvchi xodimlarning mahorati va ishonchliligi mazkur masalada muhim yoʻnalish hisoblanadi. Oʻzbekistonda turizm sohasi uchun kadrlar tayyorlash oʻrta maxsus va oliy taʼlim darajasida yoʻlga qoʻyilgan. Biroq aksariyat hollarda talabalar turizm, umumiy ovqatlanish maskani va mehmonxona biznesi sohasidagi korxonalar qanday faoliyat olib borishi haqida faqatgina nazariy bilimga ega boʻladilar xolos. Shuni hisobga olgan holda talabalarning turizm sohasidagi korxonalarda amaliyotga jalb etilishlari ularning yuqori malakaga ega boʻlishlariga ulkan hissa qoʻshadi.

Umuman olganda, jahon taraqqiyoti va milliy tajribamiz 1999 yilda qabul qilingan Oʻzbekiston Respublikasining "Turizm haqida”gi qonunini qayta koʻrib chiqishni taqozo etadi. Shuningdek, turizm, umumiy ovqatlanish va mehmonxona biznesi yoʻnalishlarida xizmat koʻrsatish sifati va meʼyorlarining standartlarini ishlab chiqish muhim.

– Rossiyadan turistlar kam kelishining sabablaridan biri takliflar paketi va charter reyslari mavjud emasligi bois yoʻl haqining qimmatligidir. Mazkur masalani davlat miqyosida hal etishni rejalashtirganmisiz?

– Maʼlumki, Rossiya bizning strategik hamkorimizdir va Oʻzbekistonning tashqi savdo aylanmasida yetakchi oʻrinni egallaydi.
Yuqorida aytib oʻtganimdek, biz turizm sohasining ulkan salohiyatini oshirish va rivojlantirishdan manfaatdormiz. Bundan tashqari, Rossiya Federatsiyasi turistlarida Oʻzbekistonning tabiat maskanlari, oʻziga xos arxitektura va madaniy yodgorliklariga boʻlgan qiziqish oshib bormoqda. Shu sababli charter reyslari, takliflar paketi tashkil etish masalasini oʻrganib chiqish va bu borada qaror qabul qilishni muhim deb hisoblayman.

–Oʻzbekiston va Rossiya oʻrtasidagi hamkorlikning bugungi holatini qanday baholaysiz va yana qaysi sohalarda oʻzaro hamkorlikni rivojlantirish salohiyati mavjud?

– Oʻtgan 25 yillik mustaqil taraqqiyot davri davomida Oʻzbekiston va Rossiya oʻrtasidagi munosabatlar har doim yuqori darajada boʻlgan. Bizni ittifoqchilik munosabatlari bogʻlab turadi. Barcha yoʻnalishlarda samarali munosabatlar yoʻlga qoʻyilgan. Mamlakatlarimizda yuzlab qoʻshma korxonalar faoliyat koʻrsatmoqda. Madaniy-gumanitar sohada muntazam ravishda turli loyihalar amalga oshirilmoqda. Biz bu munosabatlarni juda qadrlaymiz va kelgusida ham barcha sohalarda strategik va ittifoqchilik munosabatlari davom etishiga umid qilamiz.

– Partiya dasturida Oʻzbekiston tarixini soxtalashtirishdan himoya qilish yoʻnalishi koʻrsatilgan. Aynan qaysi davr koʻzda tutilgan va qaysi tarixiy maʼlumotlarni notoʻgʻri deb hisoblaysiz?

– Biz milliy oʻzlikni anglash, milliy gʻurur va qadriyat masalalariga alohida eʼtibor qaratamiz. Bu borada biz xalqimiz oʻtmishini, ajdodlarimiz tomonidan qoldirilgan boy merosni oʻrganishni maʼnaviyatni mustahkamlovchi, tarixiy meros va Vatanimizning zamonaviy taraqqiyotiga nisbatan gʻurur va hurmat tuygʻularini kuchaytirishda muhim omil deb bilamiz. Shundan kelib chiqib, xalqimizning boy tarixi, tarixiy merosini, ajdodlarimiz asarlarini oʻrganishda davom etish, Oʻzbekiston tarixining har qanday taraqqiyot davri buzib, soxtalashtirib talqin etilishiga yoʻl qoʻymaslik yoshlarni milliy tiklanish gʻoyalari, milliy madaniyat va qadriyatlarga hurmat, milliy gʻurur va qadriyatlar tuygʻusini mustahkamlash ruhida tarbiyalashning poydevori deyish mumkin.

Umuman olganda, sobiq Sovet Ittifoqi respublikalarida keyingi 20-25 yil davomida davlatning 130-150 yil ilgarigi tarixi qayta koʻrib chiqish, uni mafkuraviy qolip va bosimlardan xoli qilish jarayoni kechmoqda. Oʻzbekistonda mustaqillikning dastlabki yillaridanoq tariximizni xolis oʻrganish va qayta tiklashga katta eʼtibor qaratildi. Bu borada sovet mafkurasi taʼsiri ostida yaratilgan tariximizni soxtalashtirish va buzib koʻrsatish holatlaridan forigʻ etish, har bir davr va tarixiy shaxsni xolis oʻrganish asosiy maqsad etib belgilandi. Bizningcha, XIX asrning ikkinchi yarmidan oʻtgan asrning 90-yillarigacha boʻlgan davrdagi murakkab va ahamiyatli voqealarga nisbatan haqqoniy tarixiy faktlar asosida baho berishga ahamiyat qaratish zarur. Bu yoʻnalishdagi ishlar davom etmoqda. Oʻzbek xalqining tarixi buzib koʻrsatilishiga qarshi kurash deganimizda biz uning tarixiy haqiqatga muvofiq kelishini tushunamiz.

– "Milliy tiklanish” partiyasi milliy madaniyat, anʼana va qadriyatlarni tiklashni maqsad qilgan. U holda Sizningcha, rus tilining mamlakatdagi roli va ahamiyati qanday boʻladi, bu til maktab va oliygohlarda oʻrganiladimi?

Rossiya TIV Sergey Lavrov - Sputnik Oʻzbekiston
Siyosat
Rossiya vaziri Oʻzbekiston prezidentiga mahalliy rus xalqini qoʻllab-quvvatlagani uchun minnatdorchilik bildirdi

– Ha, darhaqiqat "Milliy tiklanish” partiyasi davlat tili – oʻzbek tilini boyitish va yanada takomillashtirish, til madaniyatini yanada yuksaltirish, oʻzbek adabiy tili meʼyor va qoidalari buzilishining oldini olishga katta eʼtibor qaratmoqda. Biroq mazkur vazifalarni amalga oshirar ekanmiz, biz aslo mamlakatimiz hududida yashayotgan millat va elatlarning oʻz tillarida soʻzlashishga boʻlgan huquqlari poymol etilishiga yoʻl qoʻymaymiz. Til bu xalqlarni birlashtiradigan asosiy muomala vositasidir.

Zamonaviy dunyoda chet tilini bilish oʻz talab va istaklarini roʻyobga chiqarish hamda boshqalar bilan muomala qilishda muhim shartlardan biriga aylanib bormoqda. Chet tili, jumladan rus tili har qayerda, boshqa mamlakatlarga sayohatdan tortib foydalanish boʻyicha texnik yoʻriqnomani oʻqishgacha kerak boʻlib qolishi mumkin, chet tilini bilish yuqori maosh toʻlanadigan lavozimga erishish imkonini berishi mumkin. Inson qancha koʻp tilni bilsa, u oʻz fikrini shunchalik mohirlik bilan bayon eta oladi va dunyodagi voqealar haqida koʻproq bilishi mumkin. Umuman, chet tilini, xususan rus tilini bilish har qanday holatda ham kishida oʻziga boʻlgan ishonchni oshiradi.

Shuning uchun biz nafaqat rus tili, balki boshqa barcha tillarni ham oʻrganishni qoʻllab-quvvatlaymiz. Agarda odamlarda chet tilini oʻrganishga ehtiyoj boʻlsa, ular uchun yetarlicha sharoit va imkoniyatlar boʻlishi lozim va hech qanday cheklashlar boʻlmasligi darkor. Eng asosiysi – davlat toʻsiq yaratmasligi, aksincha chet tillarini oʻrganish tizimini rivojlantirishda yordam berishi lozim.

– Siz past sifatli, axloqqa zid ommaviy madaniyatni  yosh avlodning maʼnaviy rivojlanishiga tahdidlardan biri deb hisoblaysiz. Siz mamlakat sanʼatini, masalan kinematografiyani qanday qoʻllab-quvvatlamoqchisiz?

Ashxobod shahri - Sputnik Oʻzbekiston
Madaniyat
Ashxobodda oʻzbek kinosi kunlari boʻlib oʻtdi

– "Yuksak maʼnaviyat – yengilmas kuch”. Bu gʻoya past sifatli ommaviy madaniyatga qarshi kurashning eng muhim tamoyili hisoblanadi. Uni hayotga toʻlaqonli tatbiq etish uchun barcha vositalar, jumladan milliy sanʼat turlaridan oqilona foydalanish darkor. Zero sanʼat – inson qalbiga eng yaqin va ishonchli yoʻl. Agarda 90 foiz axborotni koʻz orqali qabul qilishimizni hisobga oladigan boʻlsak, audiovizual vositalardan foydalanish qanchalik muhimligini anglaymiz. Bugungi kunda milliy kinematografiyani xalqning maʼnaviy ehtiyoji va jahon kinosining zamonaviy talablarini unutmagan holda sifat jihatidan yangi bosqichga koʻtarish lozim. Nima uchun? Chunki sanʼatning bu turi yoshlar ongiga, butun jamiyat hayotiga boshqalariga nisbatan kuchliroq taʼsir qiladi.

Maʼlumki, tomoshabinlar auditoriyasining 70 foizga yaqinini 14 yoshdan 25 yoshgacha boʻlganlar tashkil etadi. Aksariyat kinofilmlarning ijodkorlari ham 35 yoshgacha boʻlganlar ekanligini eʼtiborga olib xulosa qilish mumkinki, hozirda kinematografiya yetuk shaxs shakllanishida muhim oʻrin tutmoqda. Yuqoridagilardan kelib chiqib, bugungi kunda ayrim masalalarni koʻrib chiqish zarurati paydo boʻldi. Birinchidan, menimcha, kino ishlab chiqaruvchi va tomoshabin oʻrtasidagi aloqani mustahkamlash zarur. Bundan tashqari, kinematografiyadagi muammolarni muhokama qilish va zamonaviy kinoni, jumladan, birinchi navbatda yosh tomoshabinlarga moʻljallangan kinoni rivojlantirish yoʻllarini belgilab olish lozim; ikkinchidan, umumtaʼlim muassasalari oʻquv dasturlariga teatr va kino sanʼati bilan bogʻliq fanni kiritish maqsadga muvofiq; uchinchidan, zamonaviy kinofilmlar yaratish boʻyicha amaliy tadbirlar rejasini qabul qilish barobarida kinoasarlar ustidan jamoatchilik nazoratini taʼminlash kerak. Yoshlar koʻpming kishilik tomoshabin auditoriyasini tashkil etishini hisobga olib, mavjud muammolarni muhokama qilish orqali kinoijodkorlarning yaratayotgan mahsulotlari uchun masʼuliyatini oshirish darkor; toʻrtinchidan, mazkur sohadagi mutaxassislar, xususan, rejissyorlar, stsenariy mualliflari va sohaning boshqa mutaxassislarini tayyorlaydigan milliy maktab tashkil etish tashabbusini olgʻa surish lozim; beshinchidan, bevosita milliy kinematografiyaga taalluqli, xususiy studiyalar tomonidan yaratiladigan filmlarning badiiy, gʻoyaviy va malakaviy darajasini oshirishga xizmat qiluvchi qonunni qabul qilish kerak; oltinchidan, oʻzaro hamkorlikda keng miqyosli loyihalar va badiiy filmlar yaratish uchun jahonning yetakchi kinokompaniyalari bilan ijodiy aloqalarni yoʻlga qoʻyish muhim.

Yangiliklar lentasi
0