TOShKENT, 19 noya — Sputnik. O‘zbekiston va Qozog‘iston Samarqand-Chimkent-Turkiston va Chordara-Yettisoy-Jizzax yo‘nalishi bo‘yicha avtobus aloqasini joriy qilish bo‘yicha muzokaralar olib bormoqda, deb xabar qilgan kun.uz nashri.
"Bu haqda Qozog‘istonning O‘zbekistondagi elchisi Yerik Utembayev Janubiy Qozog‘iston viloyatida o‘tgan o‘zbek-qozoq biznes-anjumanida aytib o‘tdi. Utembayev shuningdek qozoq-o‘zbek agrosanoat hududini qurishni hamda nafaqat Toshkent bilan hamkorlik qilishni, balki O‘zbekistonning barcha hududlari bilan hamkorlik aloqalarini o‘rnatishni taklif qildi", — deyiladi xabarda.
"Ikki davlat iqlimi o‘xshashligi tufayli viloyatda sabzavotchilikni rivojlantirish mumkin. Sayyohlik sohasini rivojlantirish maqsadida biz Buyuk ipak yo‘lini tiklashimiz lozim. Bu yo‘nalishda bugungi kunda tegishli ishlar olib borilmoqda va hududlararo avtobus reyslarini ochish bo‘yicha muzokaralar olib borilmoqda", deb ta’kidlagan diplomat.
Qozog‘istonning "Xabar" telekanali ma’lumotlariga ko‘ra, Qozog‘iston va O‘zbekiston o‘rtasidagi savdo aylanmasini 3 barobarga oshirib, 1,5 trln tangagacha yetkazish mo‘ljallanmoqda. Bu natijaga, jumladan 10 ta qo‘shma korxona yaratish bilan erishilmoqchi.
Ta’kidlash joizki, 2015-yilda ikki davlat o‘rtasidagi savdo aylanmasi 1,67 mlrd dollarga yetgan. Bugungi kunda O‘zbekiston Qozog‘istonga gaz, paxta tolasi, kimoviy mahsulotlar, o‘g‘itlar va sabzavotlar eksport qiladi.
