TOShKENT, 7 dek — Sputnik. O‘zbekiston prezidenti Shavkat Mirziyoyev yangi yilga nom berdi, deb xabar qilmoqda "Darakchi" nashri.
Xabarda ta’kidlanishicha, 7-dekabr kuni "O‘zbekiston" xalqaro anjumanlar saroyida O‘zbekiston Konstitutsiyasi qabul qilinganligining 24-yilligiga bag‘ishlangan tantanali marosim bo‘lib o‘tgan. Unda davlat va jamoat arboblari, fan, madaniyat va san’at namoyandalari, poytaxt jamoatchiligi, O‘zbekistonda faoliyat ko‘rsatayotgan xorijiy davlatlarning elchixonalari va xalqaro tashkilotlar vakolatxonalari vakillari ishtirok etgan.
O‘zbekistonning yangi saylangan prezidenti Shavkat Mirziyoyev tantanali yig‘ilishda ma’ruza qilar ekan, kirib kelayotgan yangi — 2017-yilni O‘zbekistonda "Xalq bilan muloqot va inson manfaatlari yili" deb e’lon qilishni taklif etgan.
Prezidentining ushbu taklifi yig‘ilganlar tomonidan gulduros qarsaklar bilan kutib olingan.
