TOShKENT, 10 dek — Sputnik. G‘arbiy Qozog‘iston viloyatida yil boshidan buyon 100dan ziyod voyaga yetmagan qizlar homiladorlik bo‘yicha ro‘yxatdan o‘tkazilgan.
"G‘arbiy Qozog‘iston viloyati sog‘liqni saqlash boshqarmasi ma’lumotlariga ko‘ra, yil boshidan buyon 15-18 yoshda bo‘lgan 117 nafar qiz homiladorlik bo‘yicha ro‘yxatga olingan. Ularning 60 nafari bolali bo‘lgan, 10 nafari esa tibbiy ko‘rsatma yoki o‘z xohishiga ko‘ra, homiladorlikni sun’iy ravishda to‘xtatgan", — deyilgan Sputnik Qozog‘iston nashri tomonidan tarqatilgan xabarda.
Nashr, shuningdek, viloyat sog‘liqni saqlash boshqarmasi voyaga yetmaganlar o‘rtasida barvaqt homilador bo‘lish holati oldingi yildagiga nisbatan kamayganmi-yo‘qmi, aniqlik kiritmagani haqida yozgan.
G‘arbiy Qozog‘iston hokimiyati matbuot-xizmati esa, ayni paytda mutasaddi davlat tashkilotlari aholi o‘rtasida turli aksiya va tushuntirish tadbirlarini o‘tkazish niyatida ekanini ma’lum qilgan. Xabarda ta’kidlanishicha, tushuntirish tadbirlari qay tarzda olib borilishi haqida ma’lumot berilmagan.
