TOShKENT, 16 dek — Sputnik. Moskva shahar Migratsiya markazi matbuot-xizmati tarqatayotgan xabarlarga ko‘ra, bundan keyin markaz tomonidan migrantlarga beriladigan kvitansiyalarda maxsus QR-kod mavjud bo‘ladi.
"Bu maxsus kod yordamida Rossiyadagi Sberbank bo‘limlari va bankning o‘z-o‘ziga xizmat ko‘rsatish terminallarida, shuningdek, "Sberbank-onlayn" mobil dasturi orqali patent to‘lovini osonlikcha amalga oshirish mumkin", — deyilgan xabarda.
"Endilikda, mehnat migranti Sberbank kassalarida ushbu kvitansiyani taqdim etadigan bo‘lsa, bank operatori u haqdagi ma’lumotlarni qo‘l yordamida kiritmaydi, balki ularni skaner yordamida "o‘qiydi". Bu holat to‘lov jarayonini yengillashtiradi hamda pul to‘lovida xatoga yo‘l qo‘yilishining oldini oladi. Patentga to‘lovni terminal yoki mobil ilova orqali amalga oshirayotganda ham kodli kvitansiyani apparat skaneri yoki gadjet ekraniga yaqinlashtirilsa kifoya, ma’lumot hisobga o‘tadi", — deyilgan xabarda.
"Migrantlar patent uchun to‘lov kvitansiyasini Migratsiya markazining o‘zida olishi yoxud saytda shakllantirishlari mumkin. Mustaqil shakllantirilgan hujjatlarda ham maxsus kod bo‘ladi", — deyilgan markaz xabarida.
