TOShKENT, 30 dek — Sputnik, Nataliya Shmakova. Shokoladli tuxumlar, ya’ni "Kinder-surpriz" ixtirochisi Uilyam Saliche (William Salice) 83 yoshda Italiyada olamdan o‘tdi, deb xabar qilmoqda RIA Novosti Italiya mahalliy OAVlariga tayangan holda.
Saliche Ferrero kompaniyasida 1960-yildan to 2007-yilga qadar ishlagan va kompaniya egasi "Nutella otasi" bo‘lmish Mikele Ferreroning eng yaqin maslakdoshlaridan biri bo‘lgan. Nafaqaga chiqqach Saliche Color Your Life fondi bilan hamkorlik qilgan va o‘zini yoshlar bilan ishlash hamda iste’dodlarni qo‘llab-quvvatlashga bag‘ishlagan.
Salicheni "Kinder-surpriz" ixtirochisi deb atashganda, u "tuxumlarni Mikele Ferrero ixtiro qilgan, men faqat ijrochi bo‘lganman", deb javob qaytarishni ma’qul ko‘rgan.
Ferrero kompaniyasi surprizli shokoladli tuxumlarni 1974-yildan boshlab ishlab chiqargan. Aytish joizki, "Kinder-surpriz"lar nafaqat bolalar, balki bu tuxumlar ichidan chiqadigan o‘yinchoqlarni kolleksiya qilishni o‘z xobbisiga aylantirgan katta yoshdagi insonlar orasida ham mashhur.
