TOShKENT, 3 yanv — Sputnik. Toshkentda shahar va shahar atrofidagi yer usti jamoat transporti yo‘nalishlarini optimallashtirish metropolitenga yo‘lovchilarni jalb etish maqsadida o‘tkazilmoqda, deb xabar tarqatgan O‘zbekiston Moliya vazirligi axborot-xizmati.
Ta’kidlanishicha, bu haqda Prezidentning "Toshkent metropoliteni faoliyatini yanada rivojlantirish va samaradorligini oshirish bo‘yicha qo‘shimcha choralar to‘g‘risida"gi qarorida belgilab qo‘yilgan.
"Toshkent metropoliteni"da yo‘lovchilarni tashish rentabelligini oshirish maqsadida yer usti transporti yo‘nalishlarini metropoliten liniyalari bilan takrorlashga yo‘l qo‘ymaslik va yer ustidagi alohida yo‘nalishlarning davomiyligi hamda harakatlanish sxemasini o‘zgartirish vazifasi qo‘yilgan. Bundan tashqari qo‘shimcha tarzda yer usti transporti yo‘nalishlarining so‘nggi punktlarini metro bekatlari yonida qurish ham ko‘zda tutilgan.
Eslatib o‘tamiz, 2016-yilning oktabr oyida "Toshkent metropoliteni" DUK "O‘zbekiston temir yo‘llari" AJ tashkiliy tuzilmasiga o‘tkazilgandi.
