Samarqand viloyati hokimi Mirziyoyev rahbarlarga qanday talab qo‘yganini aytdi

TOShKENT, 12 yanv — Sputnik. "Odamlar ishongani, mushkulini oson qilishdan umidvor bo‘lgani uchun davlat organiga, u yerda o‘tirgan davlatning vakiliga, qo‘lidan ish keladigan kishiga murojaat qiladi. Hokimlik bo‘ladimi yoki boshqa davlat tashkilotimi, birinchi rahbardan boshlab eng kichik xodimgacha bu mas’uliyatni his etib, aholi bilan suhbatlashishi, ularning muammolariga yechim topishga intilishi, xalqqa chin yurakdan xizmat qilishi lozim. Aks holda, naqafat o‘z xizmat vazifalarini bajarmagan bo‘ladi, balki xalq oldida hurmatini yo‘qotadi, elning nazaridan qoladi", — deb ta’kidlagan Oqbo‘tayev.

U shuningdek O‘zbekiston prezidenti Shavkat Mirziyoyev bugun davlat xizmatchilari, mas’ul vazifalarni bajarayotgan shaxslardan aynan shuni talab qilayotganini eslatib o‘tgan, deb yozadi "Zarafshon" nashri.

Oqbo‘tayev Nurobod tumani hokimligi va boshqa tashkilotlarda 2016-yilda fuqarolarning murojaatlari bilan ishlash, ariza va shikoyatlarda ko‘tarilgan masalalarni ijobiy hal etish borasida olib borilgan ishlar tahliliga to‘xtalib, mazkur yo‘nalishda muayan kamchiliklarga yo‘l qo‘yilganini ta’kidlagan. "Yil davomida tuman hokimligi tomonidan qayd etilgan 926 ta murojaatning o‘ndan ortig‘iga belgilangan muddatda javob berilmagan. Virtual qabulxonaga tushgan 150 ta murojaatning 88 tasiga javob qaytarilgan, xolos", — degan u.

Xabarda aytilishicha, ayni paytda Nurobod tumani bo‘yicha ro‘yxatga olingan 438 ta tadbirkorlik va kichik biznes subyektining 52 tasi faoliyat ko‘rsatmayapti. 67 ta sanoat korxonalaridan 10 tasi, qurilish korxonalarining 7 tasi ishlamayapti. Yil davomida tuman iqtisodiyotiga xorijiy investitsiya umuman kiritilmagan. Iqtisodiyotdagi ana shunday kamchiliklar sababli o‘tgan yil yakuni bilan tumanning viloyat sanoat mahsulotlari ishlab chiqarishdagi ulushi atigi 1,4 %ni tashkil etgan.

Nurobodda chorvachilik bo‘yicha katta tajriba to‘plangan bo‘lsa-da keyingi yillarda bu salohiyat ham yo‘qolmoqda. Sohada naslchilikni rivojlantirish, teri va junni qayta ishlash, charm mahsulotlari ishlab chiqarishga e’tibor qaratilmayapti.

O‘zbekiston prezidenti Sh.Mirziyoyev Samarqand viloyatiga tashrifi chog‘ida Nurobod tumanida paxta maydonlarini qisqartirish, chorvachilik yo‘nalishidagi xo‘jaliklarni tugatib, fermer xo‘jaliklari tashkil etish bo‘yicha aniq topshiriq va vazifalarni belgilab bergan edi. Oradan ikki oy o‘tgan bo‘lsa-da, bu borada hali ishlar jadal boshlanmagan. Ko‘ptarmoqli fermer xo‘jaliklari tashkil etish, ekin turlarini o‘zgartirish, bog‘ va tokzorlar yaratish ishlari tizimli yo‘lga qo‘yilmagan.

Tumanda boy mineral xom ashyo bazasi, tabiiy imkoniyatlar mavjudligi sababli boshqa hududlardan ishbilarmonlar kelib tadbirkorlik, fermerlik faoliyatini yo‘lga qo‘yayotgan bir paytda nurobodliklarda tashabbuskorlik sezilmayapti. Hatto tomorqa imkoniyatlaridan ham maqsadli foydalanilmayapti.

"Bunday beparvolik, boqimandalik kayfiyati tumanda ishsizlik, fuqarolarning chet elga chiqib ketishi holatlarining ko‘payishiga olib kelmoqda", — deb ta’kidlangan xabarda.

Oqbo‘tayev tumanni ijtimoiy-iqtisodiy rivojlantirish, aholi turmush farovonligini oshirish maqsadida ishlab chiqilgan 2017-2021 yillarga mo‘ljallangan dasturning asosiy yo‘nalishlari haqida to‘xtalib, dasturda belgilangan loyihalarni amalga oshirishda tuman faollarini hamjihatlikda ishlashga da’vat etgan.